Mesrûr Barzanî û Serokwezîrê Qeterê bang li Bexdayê kir: Mîlîsan kontrol bikin

PeyamaKurd - Serokê Hikûmeta Herêma Kurdistanê Mesrûr Barzanî û Serokwezîrê Qeterê Şêx Mihemed bin Ebdulrehman El Sanî, bi rêya telefonê peywendiyek encam pêk anîn. Her du aliyan bi tundî êrîşên li ser Herêma Kurdistanê û Qeterê şermezar kir û daxwaz ji hikûmeta federal a Iraqê kirin ku rê li ber komên çekdar bigire.

Êrîşên li ser Hewlêr û Dohayê hatin şermezarkirin 

Li gorî daxuyaniya fermî ya Hikûmeta Herêma Kurdistanê, di vê peywendiya ku îro (2yê Nîsana 2026an) pêk hat de, her du serokwezîran êrîşên "terorîstî" yên ku van demên dawî li dijî Herêma Kurdistanê û Qeterê têne kirin, bi tundî şermezar kir. 

Aliyan nîgeraniya xwe ya kûr li hemberî zêdebûna şer û rageşiya li Rojhilata Navîn anîn ziman û tekezî li ser parastina aştiya herêmî kirin.

Metirsiya milîsên derveyî qanûnê 

Mesrûr Barzanî û Şêx Mihemed El Sanî hevnêrîn bûn ku mîlîşya û komên çekdar ên derveyî qanûnê, bûne sedema metirsiyeke mezin û gefê li ser ewlehiya tevahiya navçeyê dixwin. Her du rêberan destnîşan kir ku ji bo parastina aramiyê, divê Hikûmeta Iraqê berpirsiyariya xwe bi cih bîne û van koman kontrol bike.

Serokwezîrê Qeterê bal kişand ser giringiya parastina aştiyê û diyar kir ku divê hemû gefên ewlehiyê bi cidî werin girtin. Serokwezîr Mesrûr Barzanî jî piştgiriya Herêma Kurdistanê ji bo gelê Qeterê li hemberî her geşedaneke nexwestî dubare kir.

Di dawiya hevdîtinê de, her du aliyan li ser berdewambûna peywendî û hevahengiyê li hev kirin da ku bi hev re rûbirûyî astengî û dijwariyan bibin.