NYê li ser pevçûnên li Helebê daxuyanî da

PeyamaKurd – Neteweyên Yekbûyî (NY) li ser raporên pevçûnên li Helebê nîgeraniyeke kûr nîşan da û bang li hemû aliyan kir ku ji bo bicîhanîna peymana 10ê Adarê danûstandinan bikin.

Berdevkê Sekreterê Giştî yê NY Stephane Dujarric doh di civîna çapemeniyê ya rojane de derbarê rageşiya li Helebê de daxuyanî da.

Dujarric diyar kir, "Ez dikarim ji we re ragihînim ku Sekreterê Giştî ji ber raporên mirin û birîndarbûna sivîlan piştî pevçûnên li Helebê nîgeran e. Em hemî aliyan teşwîq dikin ku nermbûn û niyeta baş di warên leşkerî û siyasî de nîşan bidin û tavilê ji nû ve danûstandinan ji bo bicîhanîna bi tevahî ya peymana 10ê Adarê bidin destpêkirin."

Dujarric ji hemî aliyan re erkê xwe yê di bin qanûna mirovî ya navneteweyî de ji bo parastina sivîlan û binesaziya sivîl bi bîr xist û bang li hemî aktoran kir ku tavilê rageşiyê kêm bikin û xweragiriya herî zêde nîşan bidin.