Serokkomarê Iraqê: Em li ser mijara PKKê weke Tirkiyeyê difikirin

PeyamaKurd - Serokkomarê Iraqê Nîzar Amedî diyar kir ku hebûna PKKê zerarê dide wan û ew bi Tirkiyeyê re di asta bilind de ne da ku rêxistin çekên xwe deyne û ev mijar bi tevahî were girtin.

Di hevpeyvînek taybet de bi televîzyona El Arabiya ya li Erebistana Siûdî re, Serokkomarê Iraqê Nîzar Amedî derbarê pêvajoyê de nirxandinên girîng kir.

"Em bi Tirkiyeyê re li hev dikin"

Amedî diyar kir ku mijara PKKê pirsgirêkek tevlihev û kûr e û got, "Meseleya şer, hedefgirtin û bikaranîna hêza leşkerî wê vê dosyayê bi dawî neke. Tirkiyeyê bi PKKê re projeyek aştiyê pejirandiye û ev bi rêya rêberê PKKê Ocalan tê kirin."

Amedî destnîşan kir ku di nav pêvajoyê de pêşketinên berbiçav çêbûne û got, "Di vî warî de gav hatine avêtin. Beşek ji PKKê çekên xwe danîne û di demek nêzîk de dê ji aliyê Meclîsa Mezin a Neteweyî ya Tirkiyeyê ve biryarek li ser qanûnekê were dayîn. Bê guman, hebûna PKKê zerarê dide Iraqê û Iraq piştgiriyê nade PKKê."

Amedî bi gotina ku rêbazên leşkerî tenê çareseriyê naynin, destnîşan kir: "Em bi Tirkan re li ser bidawîkirina vê pirsgirêkê li hev dikin û em hevkariyê dikin. Ji ber ku bidawîkirina pirsgirêka PKKê û avakirina aştiyê li Tirkiyeyê di berjewendiya hem Iraqê û hem jî Tirkiyeyê de ye."

Amedî, bi şirovekirina ku rewşa herêma Sincarê (Şengal) rasterast bi pirsgirêka PKKê ve girêdayî ye, li ser pêşketinên li Sûriyeyê jî axivî û got, "Li Sûriyeyê çareseriyek hat bidestxistin, û di navbera hêzên HSDê yên li Sûriyeyê û hikûmeta Şamê de lihevkirinek hat bidestxistin, û di navbera wan de aştî hat avakirin. Ez bawer dikim ku em di mijara Tirkiyeyê û pirsgirêka PKKê de pêşketinê dikin û piştgiriyê didin. Wekî din, ji bo bidawîkirina vê pirsgirêkê di navbera her du welatan de hevrêziyek asta bilind heye. Herwiha hewcedariya me bi aqil, sebir û demê heye."