Turkish Airlines rawestandina geştên hewayî yên ji bo Silêmaniyê dirêj kir

PeyamaKurd - Turkish Airlines (THY) rawestandina geştên bo Balafirgeha Navneteweyî ya Celal Talabanî li Silêmaniyê heta 30ê Îlona 2026an dirêj kir, bi hinceta fikarên ewlehiyê û bêîstîqrariya li herêmê.

Ata Enwer, Serokê Komeleya Ajans û Ofîsên Geştê yên Silêmaniyê, îro ragihand ku THY biryara xwe ya rawestandina geştên bo Silêmaniyê heta 30ê Îlona 2026an dirêj kiriye. Enwer her wiha diyar kir ku şîrket geştên bo Balafirgeha Navneteweyî ya Hewlêrê heta 7ê Tebaxê rawestandiye.

Ev biryar li ser nirxandinên rîskê yên ku di çarçoveya rewşa heyî ya li herêmê û protokolên ewlehiya firînê de hatine kirin hatiye girtin.

Ata Enwer destnîşan kir ku THY ji Nîsana borî ve tu geşt bo Silêmaniyê pêk neaniye, û ev rawestandin wê demekê berdewam bike.

Ji ber zêdebûna aloziyan li Rojhilata Navîn, gelek şîrketên hewayî yên navneteweyî biryar dane ku ji bo parastina ewlehiya firînê rêyên geştên xwe yên bo herêmê demkî rawestînin an biguherînin.