Zeydî ji bo piştgiriya Hewlêrê dest bi hevdîtinan dike

PeyamaKurd - Serkirdeyê Tevgera Hîkmeyê Rehîm Ebûdî eşkere kir ku Serokwezîrê Raspartî Elî Zeydî di serdana Herêma Kurdistanê de dê bi rayedarên payebilind û aliyên siyasî yên Kurdistanê re bicive daku piştgiriya wan ji bo kabîneya nû ya hikûmeta Iraqê misoger bike.

Ebûdî destnîşan kir ku Zeydî dixwaze "hikûmeteke bi kalîte û bihêz" ava bike û di vê qonaxê de îradeyeke wî ya cidî heye ku pirsgirêkên di navbera Bexda û Hewlêrê de bi rêya diyalogê çareser bike û peywendiyan berfirehtir bike.

Elî Zeydî, ku di 27ê Nîsana 2026an de ji aliyê Çarçoveya Hevahengiyê ve wekî yekane namzedê serokweziriya Iraqê bo kabîneya nû hatibû diyarkirin, hewl dide hikûmetekê ava bike ku hemî pêkhate û hêzên siyasî yên Iraqê tê de cih bigirin.

Rehîm Ebûdî bal kişand ser rewşa hestiyar a herêmê û got ku ji bo rûbirûbûna gefan, Zeydî parastina berjewendiyên neteweyî wekî bingeh girtiye.

Ev hewildana Zeydî ya ji bo misogerkirina piştgiriya hemî pêkhateyan, wekî nîşaneya hevsengiyeke nû di siyaseta Iraqê de tê dîtin daku welat ji qeyranên navxweyî û zextên herêmî were parastin.