عێراق ٢٢٥٠ دەستبەسەرکراوی ڕێکخراوی "داعش" لە سووریاوە وەردەگرێت

پەیامی کورد... عێراق ٢٢٥٠ دەستبەسەرکراوی ڕێکخراوی "داعش" لە سووریاوە وەردەگرێت

شانەی ڕاگەیاندنی ئەمنی، ئەمڕۆ شەممە، وەرگرتنی ٢٢٥٠ دەستبەسەرکراوی ڕێکخراوی دەوڵەتی ئیسلامی "داعش"ی لە سووریاوە ڕاگەیاند، و ئاماژەی بە دەستپێکردنی ڕێکارەکانی پۆلێنکردنیان لە ڕووی دادوەرییەوە کرد.

فەریق سەعد مەعن، سەرۆکی شانەی ڕاگەیاندنی ئەمنی لە لێدوانێکدا بۆ ئاژانسی هەواڵی عێراق وتی: "عێراق ٢٢٥٠ تیرۆریستی لە لایەنی سووریاوە بە ڕێگەی وشکانی و ئاسمانی و بە هەماهەنگی لەگەڵ هاوپەیمانی نێودەوڵەتی و بە هەوڵێکی زۆری هێزە ئەمنییەکان وەرگرتووە، و لە ناوەندە توندوتۆڵە فەرمییەکاندا دەستبەسەر کراون."

ئەو بەرپرسە سەربازییە عێراقییە وتیشی: "حکومەت و هێزە ئەمنییەکان ئامادەکارییان بۆ ئەم ژمارە زۆرە کردووە، بۆ دوورخستنەوەی مەترسی نەک تەنها لەسەر عێراق، بەڵکو لەسەر ئاستی هەموو جیهانیش."

ڕوونی کردەوە کە "تیمە تایبەتمەندەکان دەستیان کردووە بە لێکۆڵینەوەی سەرەتایی و پۆلێنکردنی ئەم ئەندامانە بەپێی ئاستی مەترسیدارییان، جگە لە تۆمارکردنی دانپێدانانەکانیان لەژێر سەرپەرشتی ڕاستەوخۆی دادوەریدا."

مەعن جەختی کردەوە کە "پرەنسیپی چەسپاو بریتییە لە دادگاییکردنی هەموو ئەو کەسانەی تێوەگلاون لە ئەنجامدانی تاوان دژی عێراقییەکان و ئەوانەی ئەندامی ڕێکخراوی تیرۆریستی داعشن، لەبەردەم دادگا تایبەتمەندەکانی عێراقدا."

ئاماژەی بەوەش کرد کە "وەزارەتی دەرەوە لە پەیوەندی بەردەوامدایە لەگەڵ چەندین وڵات سەبارەت بە ڕەگەزنامەکانی دیکە."

باسی لەوەش کرد کە "پرۆسەی ڕادەستکردنەوەی تیرۆریستان بە وڵاتەکانیان هەر کە پێداویستییە یاساییەکان تەواو بوون دەست پێدەکات، لەگەڵ بەردەوامبوونی دەزگا ئەمنییەکان لە جێبەجێکردنی ئەرکە مەیدانی و لێکۆڵینەوەییەکانیان لەم دۆسیەیەدا."

هاوپەیمانی نێودەوڵەتی بە هاوکاری لەگەڵ حکومەتی عێراق کار دەکات بۆ گواستنەوەی دەستبەسەرکراوانی ڕێکخراوی "داعش" لە سووریاوە بۆ عێراق، ئەوەش لە دوای گۆڕانکارییە سەربازییەکانی ئەم دواییەی باکووری ڕۆژهەڵاتی سووریا کە بە ڕێککەوتنی نێوان حکومەتی سووریا و هێزەکانی سووریای دیموکرات کۆتایی هات.