سیناتۆر گراهام هۆشداری لە پەرەسەندنی ئەگەریی گرژییەکان دژی کوردانی سووریا دەدات و جەخت لە پشتگیرییەکی بەرفراوان بۆ پاراستنیان دەکاتەوە

پەیامی کورد...  سیناتۆر گراهام هۆشداری لە پەرەسەندنی ئەگەریی گرژییەکان دژی کوردانی سووریا دەدات و جەخت لە پشتگیرییەکی بەرفراوان بۆ پاراستنیان دەکاتەوە

لینسی گراهام، سیناتۆری کۆماریی ئەمریکا، نیگەرانیی قووڵی خۆی دەربڕی سەبارەت بەوەی کە بە "ڕووکردنی حکومەتی نوێی سووریا بەرەو هاوپەیمانی لەگەڵ تورکیا" ناوی برد، بە مەبەستی بەکارهێنانی هێزی سەربازی دژی کوردانی سووریا؛ ئەو کوردانەی کە بە یەکێک لە بەهێزترین هاوپەیمانەکانی ویلایەتە یەکگرتووەکانی ئەمریکا لە هەوڵە بەردەوامەکان بۆ تێکشکاندنی ڕێکخراوی داعش لە سووریا دادەنرێن.

گراهام ئاماژەی بەوە کرد کە هێزەکانی سووریای دیموکرات نزیکەی ٩ هەزار لە مەترسیدارترین ئەندامانی زیندانیکراوی داعشیان لەژێر دەستدایە، و جەختیشی کردەوە کە ڕێگریکردن لە گەڕانەوەی ئەمانە بۆ مەیدانی جەنگ، بەرژەوەندییەکی باڵای ئاسایشی نەتەوەیی ئەمریکایە.

لە کاتێکدا کە پشتگیریی خۆی بۆ پێدانی "دەرفەتێکی دادپەروەرانە" بە حکومەتی نوێی سووریا دوپات کردەوە، سیناتۆرە ئەمریکییەکە جەختی لەوە کردەوە کە هەر پەرەسەندنێکی هێرشەکان دژی کورد لەلایەن هێزەکانی سووریاوە بە پاڵپشتیی تورکیا، "واقیعێکی تەواو نوێ" دەخوڵقێنێت.

هەروەها گراهام ئاماژەی بە بوونی پشتگیرییەکی بەرفراوان و قووڵی هەردوو پارتی کۆماری و دیموکرات کرد بۆ وەڵامدانەوەی هەر هەنگاوێکی لەو شێوەیە، و هۆشداریشی دا لەو باوەڕەی کە گوایە دەکرێت ئەرکی پاسەوانیکردنی زیندانیانی داعش لە جیاتی "هەسەدە" بسپێردرێت بە سوپای سووریا یان تورکیا.

لەو چوارچێوەیەدا وتی: هەر کەسێک پێی وابێت کۆنگرێس بە سیناریۆیەکی لەو شێوەیە ئاسوودە دەبێت، "تەواو هەڵەیە"، و داوای لە لایەنە پەیوەندیدارەکانیش کرد کە "دانایی و عەقڵانییەت هەڵبژێرن".