سەرکردەکانی "هەسەدە" و هێزە ئەمریکییەکان گەیشتنە دێر حافر لە ڕۆژهەڵاتی حەلەب

پەیامی کورد... سەرکردەکانی "هەسەدە" و هێزە ئەمریکییەکان گەیشتنە دێر حافر لە ڕۆژهەڵاتی حەلەب

ژمارەیەک لە سەرکردەکانی هێزەکانی سوریای دیموکرات (هەسەدە)، لەگەڵ سەرکردەکانی هێزە ئەمریکییەکان، گەیشتنە شارۆچکەی دێر حافر لە گوندەواری ڕۆژهەڵاتی حەلەب.

سەرچاوەیەکی سەربازی ڕاگەیاندووە: ئەو شاندەی گەیشتووەتە دێر حافر، فەرماندەیەکی سەربازیی ئەمریکی و چەند سەرکردەیەکی هەسەدە و یەکینەکانی پاراستنی ژن (یەپەژە) لەخۆدەگرێت، کە لە نێویاندا "ڕۆهەلات عەفرین" فەرماندەی یەپەژە و "شیا کۆبانێ" فەرماندەی هەسەدە هەن.

بەگوێرەی سەرچاوەکە، ئامانجی سەردانەکە کەمکردنەوەی گرژی و ئاڵۆزییەکانی نێوان هێزەکانی حکومەت و "هەسەدە"یە. هەروەها شاندە ئەمریکییەکە پشکنین بۆ شوێنەوارەکانی وێرانکاری و ئەو شوێنانە دەکات کە بەر بۆردومان کەوتوون.

پێشتر کاروانێکی سەربازی کە زرێپۆشەکانی هاوپەیمانی نێودەوڵەتی و هێزەکانی سوریای دیموکراتی تێدابوو، لە شاری تەبقا بەرەو شارۆچکەی دێر حافر لە ڕۆژهەڵاتی حەلەب بەڕێکەوتبوون.