ئیسرائیل لە گوندەواری باشووری قونەیترە.. تەقەکردن و پێشڕەوی بۆ ناو گوندەکان

پەیامی کورد... ئیسرائیل لە گوندەواری باشووری قونەیترە.. تەقەکردن و پێشڕەوی بۆ ناو گوندەکان

میدیاکانی سووریا ئەمڕۆ هەینی ڕایانگەیاند، هێزە ئیسرائیلییەکان جارێکی تر لە گوندەواری باشووری قونەیترە تەقەیان کردووە و بە چەکی ڕەشاشی ناوەند، ناوچەی "تەل ئەحمەری ڕۆژهەڵات"یان لە خاڵی "تەل ئەحمەری ڕۆژئاوا"وە کردووەتە ئامانج.

ئەم ڕووداوە دوای ڕۆژێک لە ڕووداوێکی هاوشێوە دێت کە تێیدا هێزە ئیسرائیلییەکان تەقەیان لە ژمارەیەک هاووڵاتی کرد لە نزیک گوندی "عەشە" لە کاتی کۆکردنەوەی قارچکدا، بە مەبەستی ناچارکردنیان بۆ جێهێشتنی ناوچەکە؛ بەپێی ئاژانسی "سانا" ئەم ڕووداوە هیچ بریندارێکی لێ نەکەوتووەتەوە.

ئاژانسەکە ئاماژەی بەوە کردووە کە هێزە ئیسرائیلییەکان ماوەیەکە بەردەوامن لە فراوانکردن و بەهێزکردنی پێگەکانیان لە "تەل ئەحمەری ڕۆژئاوا" لە ڕێگەی دروستکردنی بەربەستی خۆڵ و پاڵپشتیکردنی خاڵە سەربازییەکان، کە لە دوای ڕووخانی ڕژێمی بەشار ئەسەدەوە لەوێ جێگیر بوون.

هەروەها بەیانی دوێنێ پێنجشەممە، چەند گوندێکی گوندەواری باشووری قونەیترە شایەتی پێشڕەوی و بەزاندنی سنوور بوون لەلایەن هێزێکی پێکهاتوو لە دوو ئۆتۆمبێلی جۆری "هەمەر"، کە لە تەل ئەحمەری ڕۆژئاواوە بەرەو گوندەکانی "کۆدنە" و "عەین زیوان" بەڕێکەوتبوون تا گەیشتنە گوندی "سویسە". لەوێ بڵاوەیان پێ کرا و پشکنینیان بۆ ڕێبواران کرد و ئاستەنگیان بۆ هاتوچۆ دروست کرد.

لەم چوارچێوەیەدا، حکومەتی سووریا ئیسرائیل تۆمەتبار دەکات بەوەی بەردەوامە لە پێشێلکردنی ڕێککەوتننامەی جیاکردنەوەی هێزەکانی ساڵی ١٩٧٤، لە ڕێگەی چوونە ناو خاکی باشووری سووریا و هێرشکردنە سەر مەدەنییەکان. جەختیشی کردەوە کە بوونی هێزە ئیسرائیلییەکان و ڕێکارەکانیان لە ناوچەکەدا پووچەڵن و بەپێی یاسا نێودەوڵەتییەکان هیچ کاریگەرییەکی یاساییان نییە.

هەروەها دیمەشق داواکارییەکەی بۆ کشانەوەی هێزەکانی ئیسرائیل لە خاکەکانی سووریا نوێ کردەوە و داوای لە کۆمەڵگەی نێودەوڵەتی کرد کە بەرپرسیارێتی خۆی هەڵبگرێت و فشار بخاتە سەر ئیسرائیل بۆ پابەندبوون بە ڕێککەوتننامەی جیاکردنەوەی هێزەکان و کشانەوەی تەواوەتی لە باشووری سووریا.