مەرجەعی عەلەوییەکانی سووریا و تاراوگە داوای خۆپیشاندانی بەرفراوان دەکات

پەیامی کورد... مەرجەعی عەلەوییەکانی سووریا و تاراوگە داوای خۆپیشاندانی بەرفراوان دەکات

شێخ غەزال غەزال، مەرجەعی باڵای ڕووحیی تائیفەی عەلەوی و سەرۆکی ئەنجومەنی باڵای ئیسلامیی عەلەوی لە سووریا و تاراوگە، دوێنێ شەممە داوای خۆپیشاندانی ئاشتییانەی گشتی کرد بۆ ئەمڕۆ یەکشەممە ٢٨ی کانوونی یەکەم، لە کاتژمێر ١٢ی نیوەڕۆ تا ٥ی ئێوارە، لە هەموو مەیدانەکاندا، بۆ داواکردنی فیدراڵیزم و مافی چارەی خۆنووسین. جەختیشی کردەوە کە ئەم داواکارییانە وەک دەروازەیەکی سەرەکییە بۆ پاراستنی پێکهاتەکان و ڕاگرتنی پێشێلکارییە مەترسیدارەکان دژ بە ڕۆڵەکانی تائیفەی عەلەوی.

شێخ غەزال لە وتارێکی ڤیدیۆییدا، ڕایگەیاند کە ئەوەی ئەمڕۆ ڕوودەدات "ڕووداوێکی تێپەڕ یان پشێوییەکی کوێرانە نییە"، بەڵکو شەڕێکی جینۆسایدی سیستماتیکە کە لەبەردەم چاوی جیهاندا ئەنجام دەدرێت. ئاماژەی بەوەش کرد کە بە ئامانجگرتنەکان هاووڵاتییانی مەدەنی لە شوێنەکانی پەرستن، ماڵەکان و سەرچاوەکانی بژێوی گرتووەتەوە، و کوشتنەکان "لە سەر ناسنامە" ئەنجام دەدرێن بە ئامانجی شکاندنی ئیرادە و سەپاندنی تەسلیمبوون بە زەبری هێز.

هەروەها وتیشی: ئەوەی ناوچە عەلەوییەکان بەخۆیەوە دەبینێت ناتوانرێت وەک ململانێی نێوان لایەنە ناکۆکەکان وەسف بکرێت، بەڵکو سیاسەتێکی سیستماتیکە کە هەوڵدەدات قوربانییەکان بە زۆر بەرەو توندوتیژی پاڵ بنێت، تاوەکو جیاوازی نێوان ستەمکار و ستەملێکراو تێکەڵ بێت و ڕاستیی مەزڵوومییەت بشێوێنرێت. هۆشداریشی دا کە بێدەنگیی نێودەوڵەتی بەرامبەر ئەم تاوانانە تەنها بە واتای کوشتنی زیاتر و داڕمان دێت.

شێخ غەزال ئاماژەی بەوە کرد کە بەردەوامبوونی دۆخی ئێستا بێ چارەسەری ڕیشەیی و خێرا، و بێ سەپاندنی پاراستنی نێودەوڵەتی، دەبێتە هۆی کارەساتێکی گەورە. کۆمەڵگەی نێودەوڵەتی و بڕیارەدەستانی بە بەرپرسیاری مێژوویی زانی بەرامبەر ئەوەی مێژوو لە بێدەنگی و پشتگوێخستن بەرامبەر "چەمی خوێن" تۆماری دەکات.

شێخ غەزال غەزال لە کۆتایی وتارەکەیدا جەختی کردەوە کە بانگەواز بۆ خۆپیشاندان لە چوارچێوەی جووڵانەوەیەکی ئاشتییانەدایە کە ئامانجی بەرگریکردنە لە کەرامەت و مافەکان، و ڕەتیکردەوە بەرەو شەڕی ناوخۆ بخلیسکێن، و جەختی کردەوە کە داواکارییەکان لەسەر فیدراڵیزمی سیاسی و مافی چارەی خۆنووسین چڕبوونەتەوە، نەک لەسەر توندوتیژی یان تیرۆر.

هەروەها داوای لە "هەموو ئازادیخوازێکی پێکهاتەکانی دیکە" کرد کە پاڵپشتی ئەم داواکارییانە بن، و جەختی کردەوە کە خۆپیشاندانەکان ئاشتییانە و شارستانی دەبن و پەیامێکی ڕوونن کە پێکهاتەی عەلەوی "نابێت سووکایەتی پێ بکرێت یان پەراوێز بخرێت".

ئەم بانگەوازە لە پاش بە ئامانجگرتنی مزگەوتی عەلی کوڕی ئەبو تالیب لە شاری حومس دێت، کە بووە هۆی کوژران و برینداربوونی دەیان کەس لە ڕۆڵەکانی تائیفەی عەلەوی، کە ئەمەش ناڕەزایەتی و توڕەییەکی فراوانی لێکەوتەوە.