وەک وەڵامێک بۆ لێدوانەکانی ترەمپ.. ڕێبەری ئێران: لە بەرامبەر دوژمن پاشەکشە ناکەین

پەیامی کورد... وەک وەڵامێک بۆ لێدوانەکانی ترەمپ.. ڕێبەری ئێران: لە بەرامبەر دوژمن پاشەکشە ناکەین

عەلی خامنەیی، ڕێبەری ئێران، دوێنێ شەممە ڕایگەیاند کە وڵاتەکەی "لە بەرامبەر دوژمن پاشەکشە ناکات"، ئەمەش وەک وەڵامێک بۆ هەڕەشەکانی دۆناڵد ترەمپ، سەرۆکی ئەمریکا، سەبارەت بە دەستوەردان بۆ یارمەتیدانی خۆپیشاندەرانی ئێران لە ئەگەری ڕووبەڕووبوونەوەیان لەگەڵ تەقەکردن.

ڕۆژی هەینی، دۆناڵد ترەمپ، سەرۆکی ئەمریکا ڕایگەیاند کە ویلایەتە یەکگرتووەکان "ئامادەیە بۆ جووڵە" ئەگەر ئێران هێزی کوشندە دژی خۆپیشاندەرانی ئاشتیخواز بەکاربهێنێت، ئەمەش دوای کوژرانی حەوت کەس لە کاتی پێکدادانەکانی نێوان ناڕەزایەتییەکان و هێزە ئەمنییەکان.

وەک وەڵامێک بۆ لێدوانەکانی سەرۆکی ئەمریکا، خامنەیی وتی کە وڵاتەکەی "لە بەرامبەر دوژمن پاشەکشە ناکات".

بەگوێرەی ئەوەی ئاژانسی "تەسنیم"ی ئێرانی بڵاویکردەوە، ناوبراو ڕوونیکردەوە کە ئەو کۆبوونەوە ناڕەزایەتییانەی وڵات بەخۆیەوە بینیویەتی "زۆربەیان لەلایەن بازرگانانەوە بوون، بەڵام قسەکانیان ڕاست بوو؛ چونکە بازرگان کاتێک چاودێری دابەزینی بەهای دراوی نیشتمانی و ناجێگیریی نرخی ئاڵوگۆڕی دراو دەکات، چ ناوخۆیی بێت یان بیانی، تێدەگات کە ئەوە دەبێتە هۆی نەبوونی سەقامگیری لە ژینگەی کاردا".

ڕێبەری ئێران وتیشی: "سەرۆک کۆمار و بەرپرسە باڵاکانی دیکە هەوڵی چارەسەرکردنی ئەم کێشەیە دەدەن، ئەوە کێشەیەکی ڕاستەقینەیە و دوژمنیش دەستی تێدایە".

هەروەها ئاماژەی بەوە کرد: "ئەوەی گرنگ و مەترسیدارە ئەوەیە کە لە پشت بازرگانانەوە کەسانی هاندەر و بەکرێگیراوی دوژمن بوەستن و دروشمی دژە ئیسلام و دژە ئێران بەرز بکەنەوە".