خۆپیشاندان لە شارەکانی ڕۆژهەڵات بەردەوامە

پەیامی کورد.... خۆپیشاندان لە شارەکانی ڕۆژهەڵات بەردەوامە


لەدوای کوژرانی ژینا ئەمینی لە گرتنگەی ''گەشتی ئیڕشاد''ی تاران کە لەژێر ئەشکەنجەدا گیانی لەدەست دا، ئێستا شەپۆلێکی نوێی مانگرتن و خۆپێشاندانەکانی خەڵکی ڕۆژهەڵاتی کوردستان و ئێران دەستی پێ کردووە.

بەپێی ئەو زانیاری و ڤیدیۆیانەی لە تۆڕە کۆمەڵایەتییەکاندا بڵاو بوونەتەوە، ئەمڕۆ شەممە 8/10/2022 خەڵکی شارەکانی سنە، سەقز، مەریوان، جوانڕۆ، مەهاباد و بۆکان و چەند شاری دیکە لە ڕۆژهەڵاتی کوردستان بە داخستنی دووکان و بازاڕی ئەو شارانە درێژەیان بە مانگرتن و ناڕەزایەتی دژی حکوومەتی ئێران دا.

هەر بەگوێرەی ئەو وێنە و ڤیدیۆیانە، کاتژمێر 12ی ئەمڕۆ لە بەردەرگای زانکۆی (شەریف)ی تاران خۆپێشاندان دەستی پێ کردەوە و ناوەندی مافی مرۆڤی ئێرانیش ڕایگەیاندووە کە هاوکات خۆپێشاندانی ناڕەزایەتیی خەڵک لە گەوهەردەشتی کەرەج، زانکۆی تەکنۆلۆژیی تاران، زانکۆی ئازادی مەشهەد و قەزوین، زانکۆی ئازادی خۆراسگان دەستی پێ کردووە و لە شارەکانی سەقز و سنەی ڕۆژهەڵاتی کوردستانیش خۆپێشاندان بەردەوامە.

هاوکات لەگەڵ خۆپێشاندانی چین و توێژە جیاوازەکانی ئێران و ڕۆژهەڵاتی کوردستان دژی کۆماری ئیسلامی، لە هەفتەی ڕابردووەوە قوتابییانی زۆربەی زانکۆکانی ئێران دەستیان بە مانگرتن و خۆپێشاندان کردووە.