"ئەنجومەنی نیشتمانیی کورد" داوای ڕاگرتنی ئۆپەراسیۆنە سەربازییەکان لە شاری حەلەب دەکات

پەیامی کورد- قامیشلۆ... "ئەنجومەنی نیشتمانیی کورد" داوای ڕاگرتنی ئۆپەراسیۆنە سەربازییەکان لە شاری حەلەب دەکات

ڕۆژی چوارشەممە، ئەنجومەنی نیشتمانیی کورد لە سووریا (ئەنەکەسە) داوای لە هەموو لایەنەکان کرد دەستبەجێ ئۆپەراسیۆنە سەربازییەکان لە حەلەب ڕابگرن، گەمارۆی سەر هەردوو گەڕەکی شێخ مەقسوود و ئەشرەفییە هەڵبگرن، و ڕێگە بدەن هاوکارییە مرۆیی و پزیشکییەکان بچنە ناوچەکە. هەروەها داوای کرد پەنا ببرێتە بەر زمانی دیالۆگ، گرژییە میدیاییەکان ڕابگیرێن، پاراستنی مەدەنییەکان مسۆگەر بکرێت و گەڕەکە نیشتەجێبوونەکان تێوەگلی ململانێ سەربازییەکان نەکەن.

ئەنجومەنەکە لە بەیاننامەیەکدا نیگەرانیی خۆی دەربڕی سەبارەت بەو پێکدادانە بەردەوامانەی لە گەڕەکەکانی شێخ مەقسوود و ئەشرەفییە لە حەلەب ڕوو دەدەن، کە زۆربەی دانیشتووانەکەی کوردن و دەیان هەزار مەدەنییان تێدا نیشتەجێیە.

لە بەیاننامەکەدا هاتووە کە دۆخی ئەو گەڕەکانەی پێکدادانیان تێدا ڕوو دەدات "هۆشدارییەکە بۆ خراپتربوونی دۆخی مرۆیی و ئەمنی لە شارەکەدا"، هەروەها سەرەخۆشی لە کەسوکاری شەهیدان کرد و هیوای چاکبوونەوەی خێرای بۆ بریندارەکان خواست.

ئەنجومەنەکە ڕوونی کردەوە کە "پۆلێنکردنی ئەم دوو گەڕەکە وەک ناوچەی سەربازی لەلایەن سوپای سووریاوە و بانگەواز بۆ چۆڵکردنیان لە مەدەنییەکان، ئاماژەیەکی مەترسیدارە کە ڕەنگە ببێتە هۆی گیانلەدەستدانی زیاتری مەدەنییەکان و لێکەوتەی لێ بکەوێتەوە کە بۆ ناوچە جیاجیاکانی تری سووریاش درێژ ببێتەوە".

لە کۆتایی بەیاننامەکەدا، ئەنجومەنی نیشتمانیی کورد جەختی لەوە کردەوە کە پێویستە ئیدارەی سووریا دەستپێشخەری بکات بۆ دەستپێکردنی پڕۆسەیەکی سیاسیی هەمەلایەنە کە کێشە هەڵپەسێردراوەکان چارەسەر بکات و مافی پێکهاتەکانی سووریا بە دەستووری بپارێزێت، کە لە سەرووی هەموویانەوە مافەکانی گەلی کوردە.