بۆ تاوتوێکردنی تێکەڵکردنی ئەندامانی "هەسەدە" شاندێکی وەزارەتی بەرگری بەرەو حەسەکە بەڕێدەکەوێت

پەیامی کورد- حەسەکە... بۆ تاوتوێکردنی تێکەڵکردنی ئەندامانی "هەسەدە" شاندێکی وەزارەتی بەرگری بەرەو حەسەکە بەڕێدەکەوێت 

بەڕێوەبەرایەتیی ڕاگەیاندن و پەیوەندییەکان لە وەزارەتی بەرگری، ئەمڕۆ هەینی ڕایگەیاند، شاندێکی وەزارەت بەرەو شاری حەسەکە بەڕێدەکەوێت بۆ گفتوگۆکردن لەسەر ئەو ڕێکارانەی پەیوەستن بە تێکەڵکردنی ئەندامانی هێزەکانی سووریای دیموکرات (هەسەدە) لەناو دامەزراوەی سەربازیدا، ئەوەش بۆ جێبەجێکردنی بەندەکانی ئەو ڕێککەوتنەی لەنێوان دەوڵەتی سووریا و "هەسەدە"دا واژۆ کراوە.

ئەم جووڵەیە دوای ئەوە دێت کە هێزە ئەمنییەکانی حکومەت، ڕۆژی دووشەممەی ڕابردوو، چوونە ناو شاری حەسەکە لە باکووری ڕۆژهەڵاتی سووریا، بەگوێرەی ئەو ڕێککەوتنەی لەنێوان حکومەتی سووریا و هێزەکانی سووریای دیموکراتدا واژۆ کراوە، وەک هەنگاوێک بە ئامانجی بەهێزکردنی ئاسایش و سەقامگیری لە پارێزگاکەدا.

وەزارەتی بەرگری جەختی کردەوە کە دیدار و سەردانە مەیدانییەکان ئامانج لێیان ئاسانکردنی پرۆسەی تێکەڵکردن و دەستەبەرکردنی ڕێکخستنی گواستنەوەکەیە بە شێوەیەکی نەرم و بێ ئاستەنگ، ئەمەش ڕەنگدانەوەی پابەندبوونی دەوڵەتی سووریایە بە جێبەجێکردنی تەواوەتیی بەندەکانی ڕێککەوتنەکە.