بڕیاری نوێی قەدەغە ڕاگەیندرا

پەیامی کورد     ...      بڕیاری نوێی قەدەغە ڕاگەیندرا

ژوری ئۆپراسیۆنی پارێزگای هه‌ولێر  نوێی له‌باره‌ی خۆپارێزی له‌ ڤیرووسی كۆرۆنا ده‌ركرد و رایگه‌یاند، سه‌رجه‌م  بازاڕ و دووكانه‌كان له‌كاتژمێر 12:00ی شه‌و تا 5:00ی به‌یانی داده‌خرێن، ده‌وامی فه‌رمانبه‌رانیش بۆ 30%  كه‌مده‌كرێته‌وه‌ و هه‌فتانه‌ش چوار رۆژ ده‌وام ده‌بێت.

به‌گوێره‌ی راگه‌ێندراوێكی پارێزگای هه‌ولێر، پاشنیوه‌ڕۆی ئه‌مڕۆ شه‌ممه‌ به‌سه‌رپه‌رشتی فرسه‌ت سۆفی پارێزگاری هه‌ولێر و به‌ ئاماده‌بوونی د.عه‌لی ڕه‌شید سه‌رۆكی ئه‌نجوومه‌نی پارێزگای هه‌ولێر، ژوری ئۆپراسیۆنی پارێزگای هه‌ولێر كۆبوه‌وه‌ و ژماره‌یه‌ك بڕیاری ده‌ركرد.

ده‌قی بڕیاره‌كان:

له‌ كاتژمێر (12)ی ئه‌مشه‌و 11 له‌سه‌ر 12ی2020/7، بۆماوه‌ی یه‌ك هه‌فته‌ تاوه‌كوو كاتژمێر 12ی شه‌وی 18 له‌سه‌ر 19ی2020/7 ڕێكاره‌كان به‌مشێوه‌یه‌ی لای خواره‌وه‌ ده‌بێت:-   
                                                                          
١-له‌ سنووری سه‌نته‌ری شار و سه‌رجه‌م قه‌زاكانی دیكه‌ی سنووری پارێزگای هه‌ولێر، له‌كاتژمێر (12)ی شه‌و تاوه‌كو (5) به‌یانی، سه‌رجه‌م  بازاڕ و دووكان و هه‌موو ئه‌و شوێنانه‌ی بۆ خزمه‌تی هاووڵاتییان كراوه‌ن داده‌خرێن، جگه‌ له‌ ده‌رمانخانه‌كان.                                                                                                                                              
٢- هاتووچۆ له‌نێوان پارێزگای هه‌ولێر و پارێزگاكانی دیكه‌ی هه‌رێمی كوردستان و عێراق به‌داخراوی ده‌مێنێته‌وه‌، جگه‌ له‌و حاڵه‌تانه‌ نه‌بێت كه‌ له‌ به‌یانی وه‌زاره‌تی ناوخۆی حكوومه‌تی هه‌رێمی كوردستان دیاریكراون.     
 
٣-سه‌باره‌ت به‌ كه‌رنتینی ئه‌وانه‌ی له‌وڵاتانی تره‌وه‌ له‌ڕێگه‌ی فرۆكه‌خانه‌ی نێوده‌وڵه‌تی هه‌ولێر یان له‌ده‌روازه‌ی سنووری حاجی ئۆمه‌ران و ده‌روازه‌ سنوورییه‌كانی تری هه‌رێمی كوردستان ده‌گه‌ڕێنه‌وه‌ بۆ شاری هه‌ولێر، ژوری ئۆپراسیۆنی پارێزگای هه‌ولێر دوای ئه‌وه‌ی ڕاوێژ له‌گه‌ڵ وه‌زاره‌تی ناوخۆ و وه‌زاره‌تی ته‌ندرووستی حكوومه‌تی هه‌رێمی كوردستان ده‌كات ئه‌و رێكاره‌ ده‌گرێته‌به‌ر، هه‌موو ئه‌وانه‌ی له‌ ووڵاتانی تره‌وه‌ ده‌گه‌ڕێنه‌وه‌ ده‌بێت پشكنینی پشتڕاستكراوه‌یان له‌و شوێن و ووڵاته‌ی كه‌ لێیه‌وه‌ هاتون لابێت و ماوه‌كه‌ی (48) كاتژمێری به‌سه‌ردا تێپه‌ڕنه‌بووبێ، به‌پێچه‌وانه‌وه‌ له‌سه‌ر ئه‌رك و تێچووی خۆیان پشكنییان بۆ ئه‌نجام ده‌درێت و به‌ڵێن نامه‌یان لێوه‌رده‌گیرێت كه‌ بۆ ماوه‌ی (14) ڕۆژ له‌شوێنی حه‌وانه‌وه‌ یان ماڵه‌كه‌ی خۆیان كه‌ره‌نتین بكرێن.     
                                                                              
٤-سه‌باره‌ت به‌بازگه‌كانی پارێزگای هه‌ولێر له‌گه‌ڵ پارێزگاكانی دیكه‌ی هه‌رێمی كوردستان و عێراق، ژووری ئۆپراسیۆنی پارێزگای هه‌ولێر به‌سه‌رپه‌رشتی به‌ڕێوبه‌رایه‌تی گشتی ته‌ندرووستی هه‌ولێر، سیسته‌مێكی بۆ پشكنین و چۆنیه‌تی هاتنه‌ ژوره‌وه‌ی ئه‌و هاووڵاتییانه‌ی ده‌یانه‌وێت بێنه‌ هه‌ولێر داڕشتوه‌ و له‌ سه‌ره‌تای هه‌فته‌ی داهاتوودا ئه‌و سیسته‌مه‌ ده‌چێته‌ واری جێبه‌جێكردن.        
                                                           
٥- ژووری ئۆپراسیۆنی پارێزگای هه‌ولێر له‌ كۆبوونه‌وه‌یدا ته‌واوی ئه‌و گله‌یی و سه‌ر‌نج و ڕه‌خنه‌ و كه‌م و كوڕیانه‌ی هه‌بون سه‌باره‌ت به‌ نه‌خۆشخانه‌كانی تایبه‌ت به‌ كۆرۆناو پاك و خاوێنی و خزمه‌تكردنی نه‌خۆشه‌كانی تاوتوێكرد و خستیه‌ به‌رباس، دڵنییای ده‌ده‌ینه‌ هه‌مو لایه‌ك‌ به‌ زوترین كات هه‌ر گرفت و كێشه‌یه‌ك هه‌یه‌ چاره‌سه‌ر ده‌كرێت.        

   ٦- چێشتخانه‌كان به‌ پابه‌ندبون به‌ڕێنماییه‌ ته‌ندرووستییه‌كان و بڕیاره‌كانی ده‌سته‌ی گه‌شت گوزار كراوه‌ده‌بن، هه‌ر چێشتخانه‌یه‌ك ئه‌و مه‌رجه‌ ته‌ندروستییانه‌ی بۆیان دیاركراوه‌ جێبه‌جێیان نه‌كات شوێنه‌كه‌ی داده‌خرێت بۆ ماوه‌یه‌ك كه‌ له‌ هه‌فته‌یه‌ك كه‌متر نه‌بێت.
                                    
٧- به‌هۆی بڵاوبوونه‌وه‌ی ڤیرووسی كۆرۆنا به‌ شێوه‌یه‌كی فراوان له‌ شاری هه‌ولێر و مه‌ترسی داری دۆخه‌كه‌ (مزگه‌وت، كڵێسا، شوێنه‌ ئاینییه‌ پیرۆزه‌كان، هۆڵی بۆنه‌ ئاینییه‌كان) به‌داخراوی ده‌مێننه‌وه‌ و پرسه‌ دانان و چوونه‌ سه‌رقه‌بران قه‌ده‌غه‌یه‌. 
                                                      
8-ئه‌م شوێنانه‌ش به‌داخراوی ده‌مێننه‌وه‌ (هۆڵه‌كانی ئاهه‌نگ گێران، هۆڵه‌كانی بوك گواستنه‌وه‌، یانه‌ی شه‌وانه‌، نێرگه‌له‌كێشان، هۆڵ و سه‌نته‌ره‌كانی له‌شجوانی، هۆڵه‌كانی وه‌رزشی، مه‌له‌وانگه‌، هۆڵه‌كه‌كانی ئاهه‌نگی شه‌وانه‌، یانه‌كانی مه‌ی خواردنه‌وه‌ (بار)، گه‌رماو (حه‌مام)، سه‌نته‌ره‌كانی مه‌ساج).                                                                 
                                                                                                                                                                                9- سارده‌مه‌نی، چایه‌خانه‌، ڕیستۆرانتی باخچه‌كان، سه‌رجه‌م شوێنه‌كانی هاوشێوه‌یان، ده‌بێت ته‌نها به‌ كه‌ل و په‌لی سه‌فه‌ری كه‌ بۆ یه‌ك جار به‌كارده‌هێنرێت كاربكه‌ن و ڕه‌چاوی ڕێنماییه‌ ته‌ندروستییه‌كان بكه‌ن، به‌ پێچه‌وانه‌وه‌ شوێنه‌كه‌یان داده‌خرێت بۆ ماوه‌یه‌ك كه‌ له‌هه‌فته‌یه‌ك كه‌متر نه‌بێت.  
                                                                                                                                                                                  
10-له‌ رۆژانی هه‌ینی (بازاڕه‌ میللیه‌كان، گۆڕه‌پانه‌كانی باڵنده‌، پیشانگاكانی ئۆتۆمۆبێل) به‌ته‌واوی داده‌خرێن و هاتوچۆكردن لێیان قه‌ده‌غه‌یه‌.                           

11-ده‌وامی فه‌رمانگه‌كان، جگه‌ له‌ (ته‌ندروستی، پۆلیس، ئاسایش، فه‌رمانگه‌ خزمه‌تگوزارییه‌كان)، به‌سیسته‌می شه‌فتات و به‌ڕێژه‌ی له‌ 30% ده‌بێت له‌ڕۆژانی (یه‌ك شه‌ممه‌ تاوه‌كو چوارشه‌ممه‌)، سه‌رجه‌م فه‌رمانبه‌رانی فه‌رمانگه‌كان ده‌بێت (ده‌مامك) ببه‌ستن، هه‌ر فه‌رمانبه‌رێك له‌ كاتی ده‌وام (ده‌مامك)ی نه‌به‌ستابێت رێكاری كارگێری به‌رامبه‌ری ده‌گیرێته‌ به‌ر، هیچ هاوڵاتییه‌ك و موراجعێك به‌بێ به‌ستنی (ده‌مامك) بۆی نیه‌ بچێته‌ ناو هیچ فه‌رمانگه‌یه‌ك، هه‌ر فه‌رمانگه‌یه‌ك قه‌ره‌بالغی تێدا دروستبێت به‌ هه‌ماهه‌نگی له‌گه‌ڵ وه‌زاره‌تی په‌یوه‌ندیدار ده‌وام له‌و فه‌رمانگه‌یه‌ ڕاده‌گرین، ئه‌و فه‌رمانبه‌رانه‌شی جێنشینی ده‌ره‌وه‌ی شاری هه‌ولێرن و ده‌وامییان له‌ناوی سه‌نته‌ری شاری هه‌ولێره‌، پێویست ناكات ده‌وام بكه‌ن.                                                                                                           

12-له‌ هه‌ر شوێنێكی بازرگانی و بازار و دوكان و ماركێت و مۆڵ و چێشتخانه‌یه‌ك رێنماییه‌ ته‌ندروستیه‌كان جێبه‌جێ نه‌كرێن، ده‌ست به‌جێ ئه‌م شوێنه‌ داده‌خرێت، بۆ ماوه‌یه‌ك كه‌ له‌ هه‌فته‌یه‌ك‌ كه‌متر نه‌بێت.    
                          
13-كردنه‌وه‌ی نۆڕینگه‌ و سه‌نته‌ر و كۆمه‌ڵگه‌ پزیشكییه‌كان ئاره‌زومه‌ندانه‌ ده‌بێت و ئه‌وانه‌شی كراوه‌ ده‌بن ده‌بێت ئه‌و مه‌رجانه‌ی خواره‌وه‌ یان تێدابێت:
                                                                                                                            
ـ كردنه‌وه‌ی نۆڕینگه‌كان له‌ كاتژمێر 3:00ی دوای نیوه‌ڕۆ بۆ 8:00ی ئێواره‌ ده‌بێت. 
                                                                                                                                                                                                                                  
ـ له‌ هۆڵی چاوه‌ڕوانی له‌ چوار نه‌خۆش زیاتری لێ نه‌بێت و نێوانی هه‌ر یه‌كه‌یان دوومه‌تر كه‌متر نه‌بێت.                                                                                                                                                  
ـ پزیشك ده‌ستكێشی له‌ده‌ست بێ و (ده‌مامك) ببه‌ستبێ.  
                                                                                    
ـ نه‌خۆش یه‌ك هه‌واڵی زیاتر له‌گه‌ڵ نه‌بێت و هه‌ردوكیان (ده‌مامك)یان به‌ستابێ. 
                                                                                                                                                                                                                               
ـ  ڕۆژانه‌ نۆڕینگه‌ و سه‌نته‌ر و كۆمه‌ڵگاكان (تعقیم) بكرێن.          
                                           
ـ له‌و ماوه‌یه‌دا له‌(كاتژمێر 3:00 بۆ 7:00) له‌  (10) نه‌خۆش زیاتر نه‌بینرێت. 

14- ده‌سه‌ڵاتی ته‌واو ده‌درێت به‌ سه‌رجه‌م قایمقامه‌كان بۆ به‌رگرتن له‌ كۆرۆنا و جێبه‌جێكردنی ڕێكاره‌كانی خۆپارێزی، هه‌ر بڕیارێك له‌ سنوری قه‌زاكه‌یان بیده‌ن و له‌ كاتی پێویستیش بۆیان هه‌یه‌ له‌سنووری قه‌زاكه‌یان كه‌ره‌نتین و قه‌ده‌غه‌ی ته‌واوه‌تی ڕابگه‌یه‌نن.
                                                                    
15- ئه‌م بڕیارانه‌ له‌كاتژمێر 12ی شه‌وی 11 له‌سه‌ر12 ئه‌م مانگه‌وه‌، ده‌چێته‌ واری جێبه‌جێكردنه‌وه‌ تاوه‌كو كاتژمێر 12ی شه‌وی  18 له‌سه‌ر 19ی ته‌موزی 2020