دوو بەندکراوی دیکەی کورد لە بەندیخانەی سنە لەسێدارە دران

پەیامی کورد... دوو بەندکراوی دیکەی کورد لە بەندیخانەی سنە لەسێدارە دران

سەرلەبەیانی ئەمڕۆ پێنجشەممە ٢٨ی جولای ٢٠٢٢ سزای سێدارەی دوو هاووڵاتیی خەڵکی سەوڵاوا بە ناوەکانی هیوا ئەحمەدی و پەیام یەزدانی لە بەندیخانەی ناوەندیی سنە جێبەجێ کرا.

بەگوێرەی هەواڵێکی ڕێکخراوی مافی مرۆڤی هەنگاو، هیوا ئەحمەدی خەڵکی گوندی بێساران و پەیام یەزدانی خەڵکی گوندی سەروماڵ سەر بە شاری سەوڵاوا، پێنج ساڵ لەمەو پێش لە دۆسیەیەکی هاوبەشدا بە تۆمەتی کوشتنی ئەنقەست دەستبەسەر و دواتر لەلایەن دەزگای دادی کۆماری ئیسلامیی ئێرانەوە سزای سێدارەیان بەسەردا سەپا.

ئەم دوو هاووڵاتییە ڕۆژی سێشەممە هاوڕێ لەگەڵ دوو بەندکراوی دیکە بە ناوەکانی عەبدوڵڵا ڕەحیمی تەمەن ٧٢ ساڵ و سوهەیلا عابیدی تەمەن ٣٣ ساڵ بە مەبەستی جێبەجێ کرانی سزای سێدارە گوازرابوونەوە ژووری تاکەکەسیی بەندیخانەی ناوەندیی سنە. سزای سێدارەی سوهەیلا عابیدی و عەبدوڵڵا ڕەحیمی ڕۆژی ڕابردوو جێبەجێ کرا.