لیژنەی باڵای ڕووبەڕووبوونەوەی کۆرۆنا لە هەرێم كۆ دەبێته‌وه‌

برياره‌ سبه‌ى لیژنەی باڵای ڕووبەڕووبوونەوەی کۆرۆنا لە هەرێم كۆببێته‌وه‌ و بڕیاری نوێ دەربکات و،پێداچوونەوە بە بڕیارەکان دەکات کە پێشتر بۆ خۆپارێزی لە ڤایرۆسی کۆرۆنا درابوون.

د. سامان بەرزنجی، وەزیری تەندرووستی حکوومەتی هەرێمی کوردستان رایگەیاندووه‌: “بڕیارە سبەی لیژنەی باڵای رووبەڕووبوونەوەی کۆرۆنا بۆ پێداچوونەوە بە بڕیارەکان کۆببێتەوە، ئەوەی پێویست بێت بۆ بەرژوەندی هاووڵاتییان گفتوگۆی لەسەر دەکەین و پێشنیازەکانیشمان دەخەینە بەردەم لیژنەی باڵا”.

وەزیری تەندرووستی حكوومه‌تى هه‌رێمى كوردستان وتووشيه‌تى: “ئێستا ئامارەکانی تووشبوون بە کۆرۆنا کەمبووەتەوە، چونکە پێشتر لە مانگی ٨ هەڵکشا و لە ماوەی شەش هەفتەدا گەیشتە لووتکە، بەڵام ناتوانین بڵێین مەترسی نەماوە، پێشبینی شەپۆلی دیکە دەکرێت وەک هەموو ووڵاتانی دیکە، بەتایبەتی ئێستا کە جۆری ئۆمیکرۆن بڵاوبووەتەوە”.