لە سلێمانی چەند باندی بازرگانی ماددە سڕکەرەکان دەستبەسەر کران

پەیامی کورد ... لە سلێمانی چەند باندی بازرگانی ماددە سڕکەرەکان دەستبەسەر کران

به‌ڕێوه‌ربه‌ری بەڕێوەبەرایەتیی نەهێشتنی ماددە هۆشبەرەکان لە ئاسایشی سلێمانی ڕایگه‌یاند، چەند باندێک لەناو شاری سلێمانی ده‌ستگیركراون کە کاریان بەکارهێنان و بازرگانیکردن بووە بە ماددە هۆشبەرەکان.

عەمید پشتیوان بەهائەدین، بەڕێوەبەری نەهێشتنی ماددە هۆشبەرەکان لە ئاسایشی سلێمانی، لە کۆنگرەیەکی ڕۆژنامه‌وانیدا ڕایگه‌یاند، توانیویانه‌ چەند باندێک لەناو شاری سلێمانی دەستگیر بکەین کە کاریان بەکارهێنان و بازرگانیکردن بووە بە ماددە هۆشبەرەکان.

وتیشی، "توانیومانه‌ دەست بەسەر 99 کیلۆ و نیو ماددەی سەرەتاییدا بگرین کە لە دروستکردنی حەشیشدا بەکاردەهێندرێت".

به‌وته‌ی عەمید پشتیوان لە 2020/01/01ـەوە تاوەکو 2020/12/01 بە فەرمانی دادوەر پەڕاوی لێکۆڵینەوەیان بۆ 257 کەس کردووەتەوە بۆ ئەوانەی کە بەکارهێنەر و بارزگانی ماددە هۆشبەرەکان بوون، هاوكات 262 کەس زیندانی کراون، بەشێکیان لەوانە رەوانەی دادگا کراون، بەشێکیان بە بڕیاری دادوەر دوای ماوەیەک لە پشکنین و بەدواداچوون کە دەرکەوتووە هیچیان لەسەر نەبووە، ئازادکراون.

ژماره‌ی ئه‌و كه‌سانه‌ی ئێستا لە قۆناخی لێکۆڵینەوەدان 138 كه‌سه‌ و هەندێکیان رەوانەی دادگا کراون، ئه‌وه‌ش به‌وته‌ی عه‌مید پشتیوان.