سەرۆكایەتیی ئەركانی وەزارەتی پێشمەرگە ڕاگەیاندراوێك لەبارەی ڕووداوەكەی مەخموور بڵاو دەكاتەوە

پەیامی کورد... سەرۆكایەتیی ئەركانی وەزارەتی پێشمەرگە ڕاگەیاندراوێك لەبارەی ڕووداوەكەی مەخموور بڵاو دەكاتەوە


سەرۆكایەتیی ئەركانی وەزارەتی پێشمەرگە، ڕاگەیاندراوێكی لەبارەی دوێنێی مەخموور بڵاو كردەوە و ئاماژە بەوە دەدات: "سەرەخۆشی و هاوخەمیی قووڵی خۆمان ئاراستەی کەسوکاری قوربانییان دەکەین."

ئەمڕۆ دووشەممە 23/10/2023، سەرۆكایەتیی ئەركانی وەزارەتی پێشمەرگە، ڕاگەیاندراوێكی لەبارەی دوێنێی مەخموور بڵاو كردەوە، تێیدا هاتووە: "بەداخەوە دوێنێ یەکشەممە، ڕووداوێکی ناخۆش لە ناوچەی مەخموور ڕووی دا و لە ئەنجامدا شەهید و برینداربوونی لە هەردوولا لێ کەوتەوە."

ئەوەش خراوەتە ڕوو: "سەرەخۆشی و هاوخەمیی قووڵی خۆمان ئاراستەی کەسوکاری قوربانییان دەکەین و هیوای زوو چاکبوونەوەش بۆ بریندارەکان دەخوازین."

سەرۆکایەتیی ئەرکانی وەزارەتی پێشمەرگە لە ڕاگەیاندراوەكەدا جەخت لەوە دەكاتەوە: "ئێمە پابەندبوونمان بۆ کارکردن لەگەڵ حکوومەتی فیدراڵی دووپات دەکەینەوە، لەپێناو چارەسەرێکی ڕیشەیی و بەردەوام کە ئاسایش و سەقامگیری لە سەرتاسەری عێراق بەدی بهێنێت."

لە ڕاگەیاندراوەكەدا ڕوونیش كراوەتەوە: "پشتیوانبی خۆشمان دەردەبڕین بۆ ناوەڕۆکی ڕاگەیەندراوەکەی فەرماندەی گشتیی هێزە چەکدارەکان بۆ ئەنجامدانی لێکۆڵینەوەی خێرا و شەفاف لە ڕووداوەکە بۆ دیاریکردنی هۆکارەکان و دۆزینەوەی ڕێگەچارەی گونجاو بۆ جێگیرکردنی ئاسایش و سەقامگیری لە ناوچەکە."