كشتوكاڵی هەرێمی کوردستان و عێراق: بڕینەوەی داری سنوورەكان دوژمنکارانەیە دژ بە مرۆڤایەتی

پەیامی کورد … كشتوكاڵی هەرێمی کوردستان و عێراق: بڕینەوەی داری سنوورەكان دوژمنکارانەیە دژ بە مرۆڤایەتی

هەردوو وەزارەتی کشتوکاڵی هەرێمی کوردستان و عێراق داوا لە تورکیا دەکەن بڕینەوەی داری ناوچە سنوورییەکانی بادینان ڕابگرێت.

لە ڕاگەیەندراوێكی هاوبەشدا هەردوو وەزارەتی كشتوكاڵی هەرێمی کوردستان و عێراق ئاماژەیان بەوەكردووە، “ئەو پرۆسەیە نەک هەر دوژمنکارییە بەرامبەر سروشت و ژینگەی عیراق و هەرێم، بەڵکو کارێکی دوژمنکارانەیە دژ بە مرۆڤایەتی و ژینگەی تەواوی ناوچەکە و هەموو جیهان، لەبەرئەوەی ژینگە سنووری نییە”.

هەردوو وەزارەتەكە لە ڕاگەیەندراوەكەیاندا داوا لە تورکیا دەکەن ئەو کارە ڕابگرێت، داوا لەهەردوو حکومەتی عێراق و هەرێمی کوردستانیش دەکەن بەجدی كار بۆ چارەسەرکردنی ئەو بابەتە بكەن و وەڵامیان هەبێت.

لەهەمانکاتدا داواش لە ڕێکخراوی نەتەوەیەکگرتووەکان و نوێنەری وڵاتان و ڕێکخراوە نێودەوڵەتیەکان دەکەن هاوکاریان بن “بۆ چارەسەرکردنی ئەم کارە دژ بەژینگەیە و پێویستە هەوڵی بنبڕکردنی بدرێ”.

لە ماوەی سێ ڕۆژی ڕابردوودا چەند وێنەیەک بڵاوكرانەوە و بەسترانەوە بە بڕینەوەی درەختەکان لە سنورەکانی هەرێم لەلایەن توركیاوە، بەهۆی ڕاکێشانی ڕێگاش لە باکووری کوردستانەوە بۆ سنورەکانی هەرێم، دارێکی زۆر لەلایەن سوپای تورکیاوە بڕاونەتەوە.