بوومەلەرزە شارێکی کوردانی هەژاند

پەیامی کورد... بوومەلەرزە شارێکی کوردانی هەژاند

بەیانیی ئەمڕۆ بوومەلەرزەیەکی بە گوڕی 5.2 بە پلەی ڕیختەر شاری قووچانی لە بە پارێزگای خۆراسانی ڕەزەوی هەژاند.

بەپێی زانیاریی دامەزراوەی بوومەلەرزەزانیی ئێران کاتژمێر 8:32 خولەکی بەیانیی ئەمڕۆ دووشەممە 13/9/2021 بە کاتی ئێران، شاری قووچانی لە پارێزگای خۆراسانی ڕەزەوی هەژاندووە.

ئەو بوومەلەرزەیە لە قووڵایی شەش کیلۆمەتریی زەوی ڕووی داوە و ئەو بوومەلەرزەیە هێندە بەهێز بووە کە لە شارەکانی مەشهەد، نەیشابوور، دەرەگەز و بجنووردیش هەستی پێکراوە.

سەنتەری بوومەلەرزەکە ناوچەی چاپشلووی نێوان هەردوو شاری قووچان و دەرەگەز بووە.

لەمبارەوە موحسێن نەجات سەرۆکی ناوەندی قەیرانەکانی پارێزگای خۆراسانی ڕەزەوی ئاشکرای کردووە ئەو بوومەلەرزەیە هیچ زیانێکی گیانیی نەبووە، بەڵام لە شارەکانی قووچان، کەلات و دەرەگەز حاڵەتی ئامادەباشی ڕاگەیەندراوە و هێز فریاگوزارییەکان لە ئامادەباشیدان و ڕەوانەی ناوچەکان کراون.

لە هەردوو پارێزگای خۆراسانی ڕەزەوی و خۆراسانی باکوور زیاتر لە یەک ملیۆن کورد دەژین کە ساڵانێکی زۆرە بۆ ئەو ناوچانە ڕاگوێزراون و شارەکانی قووچان، دەرەگەز، کەلات، بجنوورد و شیروان و دەورەبەری زۆربەی دانیشتوانەکەی کوردن.