لە عێراق ڕۆژانە زیاتر لە ٢٠٠ حاڵەتی جیابوونەوە تۆمار دەکرێت

پەیامی کورد... لە عێراق ڕۆژانە زیاتر لە ٢٠٠ حاڵەتی جیابوونەوە تۆمار دەکرێت

ئەنجوومەنی باڵای دادوەریی عێراق بڵاویکردووەتەوە، لە مانگی ڕابردوودا ٢١ هەزار حاڵەتی هاوسەرگیری و ٦ هەزار و ٤٩١ جیابوونەوەش تۆمار کراون، بەو پێیەش ڕۆژانە زیاتر لە ٢٠٠ حاڵەتی جیابوونەوە لە عێراق هەیە.
ئەنجوومەنەکە ئاماری مانگی ڕابردووی هاوسەرگیری و جیابوونەوەی لە عێراق بڵاو کردووەتەوە و تێیدا هاتووە، ژمارەی پرۆسەی هاوسەرگیری لەو مانگەدا ٢١ هەزار و ١٤٢ حاڵەت بووە، بەغدا پشکی شێری بەرکەوتووە و ٥ هەزار و ٢٩٨ حاڵەت تۆمار کراون، هەروەها لە کۆی حاڵەتەکان ١٧ هەزار و ٨٣٣ی لەناو دادگاکان تۆمار کراون و ٣ هەزار و ٣٠٩ حاڵەتیش لە دەرەوەی دادگاکان.
سەبارەت بە حاڵەتەکانی جیابوونەوە هاتووە، هەر لە مانگی ئابدا ٦ هەزار و ٤٩١ حاڵەتی جیابوونەوەی هاوسەران تۆمار کراون، لەو ژمارەیەش ٥ هەزار و ٦٣٦یان لەناو دادگاکان بوون و هەزار و ٨٥٥یشیان لە دەرەوەی دادگاکان، بە هەمان شێوە بەغدا پشکی شێری بەرکەوتووە و ٢ هەزار و ٣١١ جیابوونەوە تۆمار کراون.
بەپێی ئامارەکانی ئەنجوومەنی باڵای دادوەریی، ڕۆژانە زیاتر لە ٢٠٠ حاڵەتی جیابوونەوەی هاوسەران لە عێراق تۆمار دەکرێن و ئەوەش ڕێژەیەکی بەرزە، شارەزایان باس لەوە دەکەن کە زۆرینەی هۆکارەکان بۆ کێشەی کۆمەڵایەتی و کێشەی ئابووریی دەگەڕێنەوە.