Serok Barzanî peyama sersaxiyê ji Serokê Sûriyê re şand

PeyamaKurd - Serok Mesûd Barzanî derbarê qezaya trafîkê ya li Sûriyê ku bû sedema kuştin û birîndarbûna bi dehan kesan peyamek sersaxiyê ji Serokê Sûriyê Ehmed Şera re şand.

Li gorî daxuyaniyek ji Baregeha Barzaniyê, Serok Mesûd Barzanî îro (26ê Tîrmeha 2026an) ji bo qezaya trafîkê ya tirsnak a ku duh li welêt qewimî û bû sedema kuştin û birîndarbûna gelek welatiyan xemgînî û sersaxî ji Serokê Sûriyê Şera re ragihand.

Doh, li ser rêya sereke ya di navbera Dêr ez-Zor û Şamê de qezayek trafîkê ya giran çêbû dema ku du otobus li hev ketin. Hat hînbûn ku yek ji otobusan personelên Hêzên Ewlekariya Navxweyî yên Sûriyê, ya din jî sivîl hildigirt.

Li gorî hejmarên fermî, di qezayê de 35 kes mirin û 30 kes birîndar bûn.

Piştî qezayê, Serokkomarê Sûriyê Ehmed Şera daxuyaniyek da û ferman da ku hemî çavkanî ji bo alîkariya qurbaniyan werin seferberkirin û birîndar tavilê werin veguhestin nexweşxaneyan.

Di cih de piştî bûyerê, tîmên lêgerîn û rizgarkirinê û helîkopterên leşkerî ber bi cihê qezayê ve hatin şandin û birîndar birin nexweşxaneya leşkerî ya li Humsê.