Plana dîrokî ya Iraq, Sûriye û Amerîkayê: Xeta Kerkûk-Banyasê vedibe

PeyamaKurd - Berpirsên payebilind ên Iraqî û herêmî ji malpera nûçeyan a Middle East Eye re eşkere kirine ku Iraq, Sûriye û Amerîka plan dikin ku boriyeke dîrokî ya petrolê ya 800 kîlometreyî (500 mîl) ber bi beravên Sûriyeyê yên li ser Deryaya Spî ve ji nû ve çalak bikin.

Armanca serekî ya vê projeya mezin û stratejîk ew e ku alî ji krîz û aloziyên deryayî yên li Tengava Hurmizê dûr bikevin û şiyana hinardekirina enerjiyê biparêzin.

Çavkaniyan destnîşan kir ku ev pêngav di heman demê de beşek ji hewldanên hevbeş e ku serdestiya aborî û serbazî ya Îranê ya li ser Tengava Hurmizê bi awayekî berçav were kêmkirin û ewlehiya aboriya navneteweyî bikeve bin garantiyê.

Danûstandinên li Koşka Spî û hûrgiliyên peymanê

Tê çaverêkirin ku peymana ji bo ji nû ve çalakkirina vê boriyê ku di destpêkê de ji bajarê Kerkûkê ber bi bajarê beravê yê Sûriyeyê Banyasê ve diçû, hefteya bê bi awayekî fermî were ragihandin.

Hêjayî gotinê ye, ev geşedana nû di heman demê de hevdem e ligel hevdîtina çaverêkirî ya Serokwezîrê Iraqê Elî Zeydî û Serokê Amerîkayê Donald Trump a li Koşka Spî.

Berî vê serdanê nûnerê Trump ê ji bo Sûriye û Iraqê Tom Barrack, ji bo temamkirina hûrgiliyên peymanê xebatan dimeşîne û tê ragihandin ku serdana Zeydî dê rawestgeheke li eyaleta Teksasê jî di nav xwe de bigire ku navenda pîşesaziya enerjiyê ya Amerîkayê ye.

Berpirsekî payebilind ê Iraqî da zanîn ku Barrack têkiliyeke pir baş a xebatê ligel Zeydî ava kiriye û dixwaze vê projeya boriyê wekî modeleke ji bo hevkariyên bazarganî yên li herêmê bi kar bîne, ku ev hewldana nû wekî serkeftineke aborî di rûpelên polîtîkaya herêmî de tê tomarkirin.