Fuad Husên û Hakan Fîdan li Dohayê civiyan

PeyamaKurd – Wezîrê Derve yê Iraqê Fuad Husên û Wezîrê Derve yê Tirkiyê Hakan Fîdan tekezî li ser pêwîstiya kêmkirina aloziyên herêmî bi Îranê re û pêşxistina aramiya li Sûriyeyê kirin.

Daxuyaniyek ji Wezareta Derve ya Iraqê diyar kir ku Husên û hevtayê wî yê Tirk li Dohaya Qeterê, di çarçoveya 23emîn Foruma Dohayê de civiyan.

Di civînê de têkiliyên dualî yên di navbera Iraq û Tirkiyeyê de, û her weha rêbazên xurtkirina hevkariya siyasî, aborî û ewlehiyê ji bo xizmetkirina berjewendiyên her du welatan û xurtkirina aramiya herêmî hatin nîqaşkirin.

Li gorî daxuyaniyê, di civînê de mijarên herêmî, bi taybetî rewşa li Sûriyeyê hatin nîqaşkirin. Girîngiya piştgiriya hewildanên ji bo bidestxistina aramiya siyasî û aborî li welêt û teşwîqkirina destpêşxeriyên veberhênan û pêşkeftinê ji bo sivikkirina êşên gelê Sûriyeyê hate tekez kirin.

Di civînê de, ku dosyaya Îranê jî di rojevê de bû, her du wezîran li ser pêwîstiya ber bi çareseriyek siyasî ya li ser bingeha diyalog û têgihîştinê li hev kirin da ku aloziyên li herêmê kêm bibin û ewlehiya herêmî were misogerkirin.