Li Yemenê ji bo 90 rojan rewşa awarte hat ragihandin

PeyamaKurd – Serokê Konseya Serokatiyê ya Yemenê û Fermandarê Bilind ê Hêzên Çekdar Reşad el-Elîmî, ji bo parastina yekparçeyiya welat û rûbirûbûna hewildanên parçekirinê, li seranserê Yemenê ji 30ê Kanûna 2025an pê ve ji bo 90 rojan rewşa awarte ragihand. 

Di daxuyaniya serokatiyê de hat diyarkirin ku ev biryar bi armanca parastina serweriya Yemenê û têkoşîna li dijî darbeya ku ji sala 2014an vir ve berdewam dike, hatiye girtin.

Di çarçoveya biryarên nû de, ferman hat dayîn ku hemû yekîneyên leşkerî yên li parêzgehên Hadhramaut û Mahrayê bi dawî bibin û vegerin kampên xwe yên sereke. Hat ragihandin ku divê hemû xalên leşkerî radestî "Hêzên Mertala Welat" werin kirin û ev pêvajo bi hemahengiya Koalîsyona Erebî ya bi pêşengiya Erebistana Siûdî were meşandin. Her wiha parêzgarên van her du parêzgehan hatin erkdarkirin ku ji bo dabînkirina aramiyê û birêvebirina karûbarên herêmî desthilata tam bikar bînin.

Ji bo kontrolkirina ewlehiyê, li seranserê bender û xalên derbasbûnê yên hewayî, deryayî û bejayî ji bo 72 demjimêran qedexeya hatûçûnê hat sepandin, ji bilî wan deriyên ku Koalîsyona Erebî destûra wan daye. Serokatiya Yemenê di daxuyaniya xwe de bal kişand ser metirsiya parçekirina welat û îdia kir ku hinek komên serhildêr bi piştgiriya Mîrnişînên Yekbûyî yên Erebî (UAE) hewl didin aramiyê têk bibin, lê heta niha ji aliyê UAEyê ve bersiveke fermî li ser van tawanbariyan nehatiye dayîn.