Rûsya pêsniyara herêma tampon li Basûrê Sûriyeyê dike

PeyamaKurd – Rûsyayê pêşniyareke nû ji bo kêmkirina rageşiyê li ser sînorê Sûriye-Îsraîlê pêşkêş kir. Li gorî daxuyaniyên dawî, Moskow dixwaze dewriyeyên xwe yên leşkerî ji nû ve li başûrê Sûriyeyê bi cih bike da ku herêmeke tampon di navbera hêzên Îsraîlê û hikûmeta demkî a Sûriyeyê de were afirandin. Armanca vê însiyatîfê, ji bilî aramkirina herêmê, xurtkirina rola Rûsyayê wekî navbeynkarek herêmî ye.

Li gorî Ajansa Weşanê ya Îsraîlê, pêşniyara Moskowê ew e ku polîsên leşkerî yên Rûsyayê dîsa dest bi dewriyeyê li başûrê Sûriyeyê bikin û wekî "xeta veqetandinê" di navbera her du aliyan de xizmet bikin. Ev gav tê armanckirin ku aloziyê li ser xeta sînor sînordar bike û rê li ber pevçûnan bigire.

Ev pêşniyar di demekê de tê ku krîa li ser sînorê Sûriye-Îsraîlê zêde bûye û herêm di mehên dawî de bûye qada operasyonên leşkerî yên dubare yên Îsraîlê. Însiyatîfa Moskowê wekî gaveke nû di hewldana wê de tê dîtin da ku xwe wekî navbeynkar û hêzeke sereke di hevkêşeya herêmî de bi cih bike.

Di sala 2018an de, Rûsyayê di danûstandinên nerasterast ên di navbera Îsraîl û rejîma Sûriyeyê de roleke pêşeng di "îstîqrarkirina" başûrê Sûriyeyê de lîstibû. Wê demê, bi rêkeftina ku ji hêla Moskowê ve hatibû garantîkirin, hate destnîşankirin ku her ku hêzên rejîmê (rejîma Esed) vedigerin herêmê, milîsên girêdayî Îranê dê ji sînorê Îsraîlê dûr bikevin. Pêşniyara nû ya Rûsyayê nîşan dide ku Moskow dixwaze careke din bi rengekî çalak beşdarî pêvajoya aramkirina vê herêma stratejîk bibe.