Îran: Eger DYA têkeve Tengava Hurmuzê em ê êrîşî wê bikin

PeyamaKurd - Piştî daxuyaniya Amerîkayê ku ew ê piştgiriyê bide derbasbûna keştîyên ku di Tengava Hurmuzê de asê mane, artêşa Îranê gef xwar ku ger Hêza Deryayî ya Amerîkayê nêzîkî herêmê bibe, ew ê êrîşî wê bike.

Daxuyaniyek ji Baregeha Navendî ya Xetam el-Enbiya hişyarî da û got, "Em hişyar dikin ku her hêzek çekdar a biyanî, nemaze artêşa dagirker a Amerîkayê, wê rastî êrîşê were ger hewl bide ku nêzîkî Tengava Hurmuzê bibe an jî bikeve Tengava Hurmuzê."

Daxuyaniyê tekez kir ku Tengava Hurmuzê di bin kontrola Hêzên Çekdar ên Îranê de ye û divê derbasbûn ji hêla Hêzên Çekdar ên Îranê ve were hevrêzkirin. Daxwaz ji keştîyên li herêmê kir ku "ji xetereya ewlehiya xwe bi derbasbûnên nehevrêz dûr bisekinin."

Daxuyaniyê herwiha tekez kir ku Îran wê bi tundî bersiva her gef an êrîşê bide.