Îranê pakêta agirbestê aşkere kir: Ji bo kêmkirina rûxandina şer divê Amerîka tazminatê bide

PeyamaKurd - Alîkarê Wezîrê Derve yê Îranê Kazim Xerîbabadî, îro di civîneke taybet de endamên Komîsyona Ewlehiya Neteweyî û Siyaseta Derve ya Parlamena Îranê derbarê qonaxa dawî ya danûstandinên li gel Amerîkayê agahdar kir. Xerîbabadî di raporta xwe de destnîşan kir ku biryardar û tîma danûstandinan a welêt bi temamî pabendî parastina serweriya neteweyî û berjewendiyên bilind ên Îranê ne. Wî bi fermî ragihand ku di pakêta pêşniyara dawî ya ku pêşkêşî aliyê Amerîkayî kirine de, şertekî serekî hatiye danîn ku divê Amerîka ji bo qerebokirin û rûxandina mezin a ku ji ber vî şerî çêbûye, tazminateke darayî ya fermî bide Tehranê.

Hûrgiliyên plana agirbestê û eniyên şer

Li gorî raporên ku di medyaya fermî ya Îranê de hatine belavkirin, ev pêşniyara Tehranê ji xalên gelekî krîtîk û stratejîk pêk tê. Di nav şertên Îranê de; rawestandina yekcarî ya şer li ser hemû eniyan bi taybetî li Libnanê, parastina mafê meyandina ûranyûmê û çalakiyên navokî yên aştiyane, rakirina dorpêça deryayî ya Amerîkayê û serbestberdana samanên sîskirî yên Îranê cîh digrin. Her weha Tehran daxwaz dike ku hemû cezayên yekalî û biryarên Konseya Ewlehiyê ya NY werin betalkirin û hêzên serbazî yên Amerîkayê bi temamî ji herêmên derdora Îranê vekişin daku agirbesteke mayinde û ewle pêk were.