Îsraîlê ‘Qubeya Hesinî’ û personelên wê ji Îmaratê re şand

PeyamaKurd - Balyozê Dewletên Yekbûyî yên Amerîkayê (DYA) yê Îsraîlê Mike Huckabee ragihand ku Îsraîlê pergala parastina hewayî ya "Qubeya Hesinî" (Iron Dome) û personelên pispor ên ji bo xebitandina wê, dane Îmaratên Yekbûyî yên Erebî.

Huckabee di konferanseke li Zanîngeha Tel Avîvê de bal kişand ser girîngiya vê pêngavê û destnîşan kir ku ev yek encameke berbiçav a Peymanên Birahîm e.

Hêjayî gotinê ye, ev cara yekem e ku bi fermî tê ragihandin ku bataryayên vê pergala pêşketî tevî personelên Îsraîlî li welatekî Ereb hatine bicihkirin.

Encama Peymanên Birahîm

Huckabee di axaftina xwe de spasiya Îmaratê kir ku welatê yekem bû beşdarî pêvajoya asayîkirina peywendiyan bû û diyar kir ku ev hevkariya parastinê sûdeke mezin dide ewlehiya Îmaratê.

Şandina Qubeya Hesinî nîşan dide ku têkiliyên leşkerî û îstîxbaratî yên di navbera Tel Avîv û Ebû Dabî de gihîştine asteke stratejîk û baweriyeke kûr.