Koalîsyona rêveberiya dewletê ji bo komên çekdar dema dawî diyar kir

PeyamaKurd - Koalîsyona Rêveberiya Dewletê ya ku hevbendiya desthilatê ya herî mezin a Iraqê ye, di civîna xwe ya 37an de bi serokatiya Serokwezîr Elî Falih ez-Zeydî û bi beşdariya Serokê Herêma Kurdistanê Nêçîrvan Barzanî û berpirsên bilind ên dewletê, biryarên krîtîk li ser komên çekdar ên dervayî kontrola dewletê girtin.

Di daxuyaniya fermî de tekezî hat kirin ku divê çek tenê di destê dewletê de bin û hat ragihandin ku ji bo komên çekdar heta 30ê Îlona 2026an dema radestkirina çekan hatiye diyar kirin.

Hat destnîşankirin ku ew kes û komên ku piştî vê dîrokê çekên xwe radestî saziyên fermî nekin, dê li gorî Yasaya Dijî Terorê bibine armanca proseya yasayî û wekî sûcdarên li dijî ewlehiya welatî bêne nirxandin.

Her wiha hat diyar kirin ku rê nayê dan axa Iraqê ji bo êrişên ser welatên cîran bê bikaranîn.

Di civînê de ji bilî mijara ewlehiyê û parastina sînoran, geşedanên aborî û temamkirina kabîneya hikûmetê jî di rojevê de bûn.

Koalîsyonê êrişên li ser hêzên ewlehiyê yên Iraqê şermezar kirin û daxwaz kir ku tekoşîna li dijî bazirganiya madeyên hişbir û qaçaxçîtiyê bê xurtkirin.

Di mijara aboriyê de jî pirsa cihêrengkirina rêyên hinardekirina petrolê û zêdekirina dahatên derveyî petrolê hatin gotûbêjkirin.

Di dawiya civînê de banga wezaretên vala yên di kabîneyê de hat kirin da ku hikûmet bikaribe bernameya xwe ya xizmetguzariyê bi awayekî bêkêmasî di pratîkê de pêk bîne.