Netanyahû vexwendina Trump a bo "Konseya Aştiyê" qebûl kir: Mandateke gerdûnî û nîqaşên hiqûqî

PeyamaKurd – Serokwezîrê Îsraîlê Benjamin Netanyahû bi fermî vexwendina Serokê Amerîkayê Donald Trump qebûl kir daku bibe endamê "Konseya Aştiyê".

Ev dezgeha nû ku dê di bin serokatiya rasterast a Trump de be, ne tenê ji bo ji nû ve avakirina Xezeyê, lê ji bo dabînkirina aramiyê li hemû herêmên pevçûnê yên cîhanê hatiye sêwirandin.

Ofîsa Serokwezîrê Îsraîlê roja Çarşemê, 21ê Rêbendana 2026an, ragihand ku Netanyahû dê di vê konseyê de cîh bigire ku tê de gelek rêberên cîhanê amade ne. Tevî vê yekê, beşdarbûna Netanyahû nîqaşên hiqûqî bi xwe re tîne; ji ber ku Dadgeha Cezayê ya Navneteweyî bi tohmeta "sûcên şer" û "hedefgirtina bi zanebûn a sivîlan" li Xezeyê biryara girtinê ji bo wî derkiriye.

Li aliyê din, Fransayê ragihand ku ew ê beşdarî vê konseyê nebin.