Netanyahû: Nîvê artêşa nû ya Sûriyê ji cîhadîstan pêk tê

PeyamaKurd – Serokwezîrê Îsraîlê Benjamin Netanyahû, derbarê geşedanên dawî yên li Sûriyê û avabûna hikûmeta nû ya li Şamê daxuyaniyên girîng dan. Netanyahû diyar kir ku ew jî mîna Serokê Amerîkayê Donald Trump dixwazin "şansekê" bidin hikûmeta Ehmed Şera, lê fikarên wan ên kûr li ser pêkhateya artêşa nû hene.

Netanyahû di hevpeyvînekê de ligel medyaya Amerîkayê, bal kişand ser salvegera yekem a hikûmeta nû ya Sûriyê û manevrayên leşkerî yên li wî welatî. Serokwezîrê Îsraîlê got: "Me dît ku wan di salvegera yekem a vê hikûmeta nû de pêşandaneke leşkerî li dar xist. Mixabin, nîvê artêşa wan ji cîhadîstan pêk tê."

Tevî fikarên li ser hebûna cîhadîstan di nav artêşê de, Netanyahû eşkere kir ku di navbera Îsraîl û rejîma nû ya li Şamê de diyalogeke rasterast dest pê kiriye.

Netanyahû girîngiya vê diyalogê wiha anî ziman:

Em dixwazin bizanin ka em dikarin têkiliyeke cuda bi wan re ava bikin an na. Di navbera me de diyalogek heye; tiştek ku me qet bi rejîma Esed re nekiriye. Ez hêvî dikim ku ev pêwendî bibe bingeha pêşerojeke aştiyane."

Ev daxuyaniyên Netanyahû nîşan didin ku Îsraîl ji aliyekî ve ji ber hebûna komên radîkal bi fikar e, lê ji aliyê din ve ji bo aramî û aştiya li ser sînorên xwe, deriyê dîplomasiyê bi hikûmeta Ehmed Şera re vekirî dihêle.