Peymaneke girîng di navbera Tirkiye û Erebistana Siûdî de hat îmzekirin

PeyamaKurd - Di navbera Tirkiye û Erebistana Siûdî de di warên rêhesin û lojîstîkê de du memorandûmên têgihîştinê hatin îmzekirin. Peyman projeyek stratejîk a nûjenkirin û dirêjkirina Rêhesina dîrokî ya Hecazê ber bi Omanê ve dihewîne, ku armanc dike rêyeke bazirganiya cîhanî ya alternatîf ber bi Tengava Hurmuzê ve biafirîne, ku ji ber aloziyên leşkerî hejiyaye.

Wezîrê Veguhastin û Binesaziyê yê Tirkiyeyê Abdulkadir Uraloglu roja Sêşemê, 9ê Hezîrana 2026an, ragihand ku wî û Wezîrê Veguhastin û Xizmetên Lojîstîkê yê Erebistana Siûdî Saleh bin Nasser el-Casir rêze memorandûmên têgihîştinê di warên veguhastin, rêhesin û xizmetên lojîstîkê de îmze kirine.

Uraloglu diyar kir, "Em dikevin serdemeke nû ku dê parvekirina zanîn û hevkariya teknîkî, ji navendên lojîstîkê bigire heya sepanên nûjen, bêtir xurt bike."

Xala herî krîtîk a vê hevkariyê plana Tirkiyeyê ye ku xeta rêhesinê ya dîrokî ya "Hecaz" sererast bike û dirêj bike heya Omanê. Wezîrê Veguhestinê yê Tirkiyê tekez kir ku armanca sereke ya projeyê avakirina korîdoreke bazirganiya cîhanî ye ku dê wekî alternatîfek ji bo Tengava Hurmuzê, ku niha ji ber aloziyên leşkerî dikişîne, xizmet bike.

Uraloğlu diyar kir ku Tirkiye rêyên (Sûriye-Urdun-Iraqê) jî bi baldarî dişopîne û got, "Du barkirinên ceribandinê yên serketî ji Tirkiyeyê ber bi Iraqê û dû re jî ber bi Erebistana Siûdî ve îspat kirine ku ev rê pir rehet û bikêrhatî ye."

Wezîr Uraloglu destnîşan kir ku berî sala 2012an qebareya veguhastinê ya di navbera her du welatan de gihîştiye 20,000 yekîneyan û got, "Her çend ev hejmar ji ber şert û mercên herêmî kêm bûbe jî, armanca me ew e ku hevkariya xwe bigihînin astek pir ji ya berê wêdetir."