Rejîma Îranê darvekirinê wekî amûreke tepisandinê bikar tîne

PeyamaKurd - Kampanyaya "Sêşema Na ji darvekirinê re" di hefteya xwe ya 129emîn a çalakiyan de daxuyaniyeke pir giring belav kir û aşkere kir ku ji dema destpêkirina hatina Serokkomarê Îranê Mesûd Pezeşkiyan û vir ve, di nava du salan de herî kêm 3 hezar û 888 kes li wî welatî hatine darvekirin.

Di daxuyaniyê de hat destnîşankirin ku rejîma Tehranê cezayê îdamê wekî amûreke polîtîk bi kar tîne daku rê li ber nerazîbûn û çalakiyên şermezarkirinê yên civakî bigire; her wiha hat bibîrxistin ku di hefteya derbasbûyî de li Girtîgeha Adilabad a li bajarê Şîrazê jineke 52 salî hatiye darvekirin.

Ji aliyê din ve, kampanyayê bal kişand ser rewşa giran a li Girtîgeha Evînê û aşkere kir ku di 10ê Tîrmeha 2026an de hêzên ewlekariyê yên rejîmê êrişeke hovane birine ser jinên girtiyên siyasî, ku ev rûdana giran tirs û fikarên li ser parastina mafên mirovan hîn zêdetir kirine.

Di berdewamiya daxuyaniyê de hat tomarkirin ku di çarçoveya doza rûniştina Qada Alîhanî ya li bajarê Îsfahanê de, dadgehên Îranê li ser 12 girtiyên siyasî biryara darvekirinê dane ku di nav wan de hinek kes hene ku di dema binçavkirinê de hîn temenê wan di bin sînorê zaroktiyê de bû.

Ev biryarên hişk û bêhiqûqî ku li ser asta navneteweyî wekî hewildaneke din a tepisandina daxwazên azadiyê tên nirxandin, rewşeke pir aloz li herêmê ava kiriye.

Rêveberiya kampanyayê di dawiya daxuyaniya xwe de bangeke lezgîn û xurt li rêxistinên mafên mirovan, çalakvanên sivîl û hemû raya giştî ya cîhanê kir ku li dijî van biryarên hovane bêdeng nemînin û bibin dengê her kesê ku li girtîgehên Îranê bi cezayê îdamê re rû bi rû maye daku rê li ber pêlên nû yên komkujiyan were girtin.