Rejîma Îranê Cezayê darvekirinê li 3 Kurdan birî

PeyamaKurd - Dadgeha Şoreşê ya Tehranê cezayê darvekirinê da Xesrew Mihemedîniya, Mesûd Toşmalanî û Sîrwan Şehîdî

Rêxistina Mafên Mirovan a Herana derbarê biryara darvekirina sê welatiyên Kurd ên ji Rojhilatê Kurdistanê raporek weşand.

Li gorî raporê, Şaxa 23'yan a Dadgeha Şoreşê ya Tehranê cezayê darvekirinê li Xesrew Mihemedîniya, Mesûd Toşmalanî û Sîrwan Şehîdî yê 22 salî biriye.

Ev her sê ciwanên ku xelkê Kirmanşanê ne, di dema serhildanên dawî yên li Tehranê de ji aliyê hêzên ewlehiyê ve hatibûn girtin û tawanên wekî "miharebe û lihevkirina li dijî ewlehiya neteweyî" hatine xistin stûyê wan.

Hat diyarkirin ku girtî niha li Girtîgeha Qizilhesar a Kerecê tên ragirtin û di heman dozê de jinek jî bi pênc salan cezayê girtîgehê hatiye mehkûmkirin.