Teqînekê bajarê Bendera Ebasa Îranê hejand: Elektrîka bajêr qut bû

PeyamaKurd – Îro, 25ê Sibata 2026an, teqîneke pir bi tund bajarê stratejîk ê Bendera Ebas hejand. Li gorî nûçeyên ku di çapemeniya Îranê de cih girtine, piştî vê teqînê elektrîk li seranserê bajêr qut bûye û jiyana rojane sekinî.

Bendera Ebasa ku wekî navendeke sereke ya enerjî û bazirganiya deryayî ya Îranê tê nasîn, niha di rewşeke awarte de ye.

Her çend rayedarên rejîma Îranê hîna sedema teqînê bi awayekî fermî eşkere nekirine jî, raporên destpêkê diyar dikin ku teqîn di santraleke enerjiyê yan jeneratorekî mezin de pêk hatiye.

Li ser torên civakî, çalakvanên Îranî îdiayên "sabotajê" belav dikin û dibêjin dibe ku ev teqîn bi qestî hatibe kirin. Lê belê, heta niha tu belgeyên fermî ji bo piştrastkirina van îdiayan nehatine weşandin.

Li gorî agahiyên ji herêmê, beşekî mezin ê Bendera Ebas hîna bê elektrîk e. Hikûmet di dayîna daxuyaniyan de dereng maye, lê tîmên teknîkî hatine şandin da ku zirarê binirxînin.