Tirkiye dixwaze li Kerkûk û Necefê konsûlxaniyan veke

PeyamaKurd - Balyozê Tirkiyê yê Bexdayê Fatîh Yildiz ji medya tirk re ragihandiye ku ew dixwazin, li Kerkûk û Necefê konsûlxaneyên xwe vekin.

Hat ragihandin ku Yildiz bi fermî daxwaz ji hikûmeta Iraqê kiriye ku bihêlin Tirkiye li bajarên Kerkûk û Necefê konsûlxaneyên xwe veke û li wan bajaran ofîsa vîzeya Tirkiyê jî vekin daku vîze bidin xelkê.

Fatîh Yildiz li ser vekirina konsûlxaneya Kerkûkê gotiye, hebûna turkmenan ji bo Tirkiyê gelekî girîng e, ereb, kurd û mesîhiyên bajêr jî ji Tirkiyê hez dikin û dixwazin Tirkiye konsûlxaneyê li Kerkûkê veke.

Herwiha Yildiz ragihandiye ku dê konsûlxaneyên Besra û Mûsilê jî ji nû ve bên vekirin ku konsûlxaneya Mûsilê ji ber şerê DAIŞê, ya Besrayê jî ji ber alozî û xwepêşandanên li bajêr hatibû girtin.