Zelenskiy mercên plana aştiyê eşkere kir: Divê 4 alî îmze bikin

PeyamaKurd- Serokê Ukraynayê Volodimir Zelenskiy ragihand ku ji bo bidawîkirina şerê bi Rûsyayê re, divê planeke aştiyê ya ji 20 xalan pêk tê ji aliyê Ukrayna, Rûsya, DYA û welatên Ewropayê ve bi hev re were îmzekirin.

Zelenskiy da zanîn ku divê ev plana pêşniyarkirî li Ukraynayê bibe mijara referandumeke navxweyî daku gel biryara dawî bide. Ji bo lidarxistina vê referandumê bi awayekî ewle, Serokê Ukraynayê daxwaza agirbesteke herî kêm 60 rojan kir.

Zelenskiy destnîşan kir ku ew hêvî dikin di vê proseyê de zû bi pêş bikevin û îmzeya her çar aliyan wekî garantiyekê dibîne.

Li aliyê din, daxuyaniyên ji aliyê Kremlînê ve jî balê dikşînin; berpirsên Rûsyayê diyar kirin ku ew û Serokê Amerîkayê Donald Trump hemfikir in ku danûstandinên ji bo bidawîkirina şerê li Ukraynayê gihîştine qonaxa xwe ya dawî. Ev geşedan wekî nîşaneya nêzîkbûna qonaxeke nû ya dîplomatîk li herêmê tê nirxandin.