"Dibistana Seretayî ya Kurdistanê" li Belçîkayê vebû

PeyamaKurd – Li Leuven a Belçîkayê, bi saya hewildanên komek mamoste û çalakvanên Kurd ên ku ji bo parastina ziman û çanda Kurdî dixebitin, dibistanek seretayî ya bi navê "Dibistana Kurdistanê" cara yekem vebû.

Armanca sereke ya dibistanê ew e ku zimanê Kurdî fêrî zarokên Kurd ên li derveyî welêt dijîn bike, da ku her çend zarokên Kurd beşdarî dibistanên fermî yên Belçîkayê bibin jî, nasnameya xwe ya neteweyî ji bîr nekin û fêrî xwendin û nivîsandina bi zimanê xwe bibin.

Mamoste Shadiye Selim diyar kir, "Ev projeya herî xweşik e ku heta niha li Belçîkayê hatiye pêşkêşkirin. Nifşên berê alfabeya Kurdî nizanibûn. Bi saya vê projeyê, ew rewş wê biguhere."

Mamosteyek din, Naski Nesir got, "Em dixwazin spasiya Konfederasyona Dîasporayê ya Kurdistanê bikin ji bo alîkariya me di vekirina vê dibistanê de. Hêviyên me yên mezin ji bo pêşerojê hene."

Şeve Huseyin, dayikek Kurd ku du zarokên xwe anî dibistanê, kêfxweşiya xwe ya mezin ji vê înîsiyatîfê anî ziman.

Pauline, dayikeke Belçîkî ye ku mêrê wê Kurd e, herwiha got, "Pir girîng e ku zarokên me zimanê xwe yê dayikê baş fêr bibin da ku dema vegerin Kurdistanê rastî pirsgirêkên zimanî neyên."