Ilham Ahmed spasiya Senator Lindsey Graham kir

PeyamaKurd – Di demekê de ku çalakiyên leşkerî û siyasî li bakurê Helebê berdewam dikin, hişyariya tund a ku Senatorê Komarî yê Amerîkî Lindsey Graham li dijî êrîşên li ser Kurdan da, deng veda.

Hevseroka Beşa Têkiliyên Derve ya Rêveberiya Xweser a Rojava Ilham Ahmed, ji bo hişyariya wî ya ji bo Tirkiye û rêveberiya nû ya Sûriyeyê: "Ger hûn êrîşî Kurdan bikin, bersiva me wê dijwar be" spasiya Senatorê Amerîkî Lindsey Graham kir.

"Ji aliyekî ve ew êrîş dikin, ji aliyê din ve…"

Ilham Ehmed bal kişand ser helwesta nakok a hikûmeta demkî ya Sûriyeyê û got:

"Birêz Graham, ji bo piştgiriya we ya rexnegir spas dikim. Di demekê de ku hikûmeta demkî ya Sûriyeyê êrîşên hovane û bêrehm li dijî gelê Kurd li Helebê pêk tîne, ji aliyê din ve daxwaz dike ku em avahiyên xwe yên parastinê hilweşînin."

"Pêvajoya veguhêz divê li dijî berjewendiyên Kurdan û kêmneteweyan nebe"

Ahmed bi îşaret bi pêvajoya nû ya ku piştî hilweşandina rejîmê li Sûriyeyê dest pê kir, tekez kir ku deriyên diyalogê vekirî ne, lê divê mafên Kurdan werin parastin.

Ehmed got, "Em hîn jî pabendê diyalogê ne. Lêbelê, pêvajoya veguheztina siyasî li Sûriyeyê nikare li ser hesabê gelê Kurd û kêmneteweyên din ên ku mil bi mil bi DYA re li dijî DAIŞê şer kirin, pêk were."

"Peyamên we hêviyê didin me"

Ahmed bi îşareta girîngiya peyama Lindsey Graham, "Em ê hevkariya xwe ji bîr nekin," peyama xwe bi van gotinan bi dawî kir:

"Peyamên we yên zelal hêviyê didin me ku hevkariya me û qurbaniyên ku me dane wê neyên jibîrkirin. Em ji we re spasdar in ku hûn di van demên herî tarî de li kêleka hevalbendên xwe sekinîn."