Ji Nêçîrvan û Mesrûr Barzanî peyamên sala nû ya 2026an

PeyamaKurd- Serokê Herêma Kurdistanê Nêçîrvan Barzanî û Serokwezîrê Herêma Kurdistanê Mesrûr Barzanî, bi boneya hatina sala nû ya 2026an peyamên pîrozbahiyê belav kirin.

Peyama Nêçîrvan Barzanî:

Peyama Serokê Herêma Kurdistanê wiha ye:

"Ez sersala nû ya zayînî (2026) bi germî li Kurdistaniyên xoşewîst bi hemû pêkhateyên wê ve, li malbatên serbilind ên şehîdan, Pêşmergeyên qehreman, hêzên ewlehiyê û hemû gelên Îraq û cîhanê pîroz dikim.

Ez hêvîdar im sala nû, bibe sala pêkhatina hêviyan, bidawîhatina krîzan û vekirina deriyê xêr û xweşiyê ji bo hemû kesî.

Bila em hatina sala nû bikin derfetek ji bo vekirina rûpeleke nû ku em tê de nakokiyan deynin aliyekî û ruhê tebayî, lêborîn û yekrêziyê di navbera hemû hêz û aliyên siyasî û pêkhateyan de serdest be.

Hêza me di hevdûqebûlkirin, pêkvejiyan û pêkvekarkirinê de ye ku yekane garantiya parastina destkeftên me û misogerkirina mafên me yên destûrî ye.

Li ser asta Îraqê jî em hêvîdar in sala nû, bibe sala çareserkirina bingehîn a pirsgirêkan li ser bingeha destûr û hevpariya rasteqîn.

Herêma Kurdistanê wekî her tim destpêşxer û amade ye ji bo guftûgo û lihevtêgihiştinê.

Wekî her tim dê bibe faktora aramî û seqamgîriyê li herêmê û li her ku dera cîhanê be bi hemû awayî piştgiriyê dide aştiyê.

Kurdistaniyên xoşewîst,

Bila em bi hêvî û geşbîniyê li paşerojê binêrin. Em we piştrast dikin ku em dê hemû hewlên xwe bidin da ku sala 2026an, bibe sala çespandina îstîqrarê û baştirkirina jiyan û debara welatiyan.

Baweriya me bi şiyan û wizeya ciwanan û dilsoziya gelê Kurdistanê heye ji bo avakirina paşerojeke geştir.

Sala nû li hemû kesî pîroz be,
Her şad û serfiraz bin."

Peyama Serokwezîr Mesrûr Barzanî:

Bi helkefta hatina sala nû ya zayînî ya 2026an, pîrozbahiyên xwe yên herî germ li hemû hevniştimanên Herêma Kurdistanê û hemû Kurdistaniyan dikim û hêviya saleke tijî şahî û aramî ji wan re dixwazim.

Sala borî, sala çendîn destkeft û encamdana gelek projeyên giring û stratejîk bû; di heman demê de sala astengî û rûbirûbûna zehmetyariyan bû.

Bi piştevaniya Xwedayê Mezin û xweragiriya xelkê niştimanperwer ê Kurdistanê, me sala borî karî çaksaziyên Hikûmeta Herêma Kurdistanê di warên cuda de, bi taybetî dabînkirina elektrîka berdewam, çareserkirina kêşeya kêmaviyê, avakirina rê û binesaziyê û başkirina jêrxana darayî û bankî bi encam bigehînin û em di xizmetkirina zêdetir a xelkê Kurdistanê de berdewam in.

Em hêvîdar û xwazyar in ku di demeke nêz de kabîneya nû ya Hikûmeta Herêma Kurdistanê were pêkanîn, ku mixabin bi mebest rê li ber pêkanîna wê hatiye girtin.

Pêwîst e êdî berjewendiyên bilind ên Kurdistanê nebin qurbana berjewendiyên tu aliyekî.

Her wiha em hêvîdar in kabîneya nû ya fîderal jî di paşerojeke nêz de li ser bingeha prensîbên hevparî, hevsengî û lihevkirinê were pêkanîn.

Sala nû li hemûyan pîroz be û herdem di şahî û tendirustiyê de bin.