Rêveberiya Kobanî: Em ferzkirina Eyn El-Erebê red dikin

PeyamaKurd - Rêveberiya Herêmî ya Kobanî diyar kir ku tevî sozên Parêzgariya Helebê yên ji bo vekişîna hêzan û rakirina dorpêçê, rewş neguheriye û tu sozek nehatiye bicîhanîn. Wan herwiha hewldanên guhertina navê fermî yê bajêr red kirin.

Di daxuyaniyekê de, Rêveberiya Herêmî ya Kobanî ragihand ku wan di 5ê vê mehê de li ser vexwendina Cîgirê Parêzgarê Helebê serdana Helebê kirine da ku rewşa herêmê nîqaş bikin.

Li gorî daxuyaniyê, Cîgirê Parêzgar soz da ku hêzên leşkerî wê ji sînorê Kobanî vekişin û dorpêça li ser bajêr wê bi dawî bibe; lêbelê, heta niha ji bo bicîhanîna van sozan tu gavên berbiçav nehatine avêtin.

Di beşek din a daxuyaniyê de, rêveberiya Kobanî bi tundî rexne li hewldanên guhertina navê bajêr kir, û tekez kir ku ew di tu şert û mercan de guhertina navê Kobanî bo "Eyn El-Ereb" qebûl nakin û ew vê navî red dikin.

Rawangeha Mafên Mirovan a Sûriyeyê (SOHR), di raporek ku ji K24 re şandiye de, diyar kir ku rewşa mirovî li Kobanî gihîştiye astên xeternak.

Di raporê de hat destnîşankirin ku bajar êdî nikare bi vê pêla mezin a penaberan re mijûl bibe û dabînkirina pêdiviyên bingehîn ên welatiyan û kesên koçber hema hema ne mumkin bûye, ev yek jî hişyariya karesateke tenduristî û mirovî ya nêzîk dide.

Li gorî çavkaniyên herêmî û şahidên bûyerê, Çavdêriyê ragihand ku bi hezaran penaber li Kobaniyê di şert û mercên pir dijwar de dijîn, ji kêmbûna xwarin, ava vexwarinê ya paqij û dermanan dikişînin. Herwiha hat destnîşankirin ku nebûna formula pitikan û pêdiviyên bijîşkî yên bingehîn belavbûna nexweşiyan, bi taybetî di nav zarokan de, bi girîngî zêde kiriye.