Dronan bircên ragihandinê li Çiyayê Zimnako yê Silêmaniyê hedef girtin

PeyamaKurd - Di çarçoveya êrîşên li ser binesaziya Herêma Kurdistanê de, îro danê nîvro balafirên bêmirov (UAV) lûtkeya Çiyayê Zimnako ya li sînorê navçeya Meydan a parêzgeha Silêmaniyê bombebaran kirin. Di êrîşê de bircên ragihandinê yên kompanyayên mobîl zirar dîtin.

Qaymeqamê Navçeya Derbendîxanê, Amanc Mihemed Kasas, ji medyaya herêmî re ragihand ku êrîş rasterast torên ragihandinê yên sivîl kiriye hedef. Kasas diyar kir ku birc û alavên teknîkî yên kompanyayên Asiacell û Korek Telekomê yên li ser lûtkeya çiyê rastî zirareke mezin a madî hatine.

Ev êrîş di roja şeşemîn a operasyonên Amerîka û Îsraîlê yên li dijî Îranê de pêk tê. Li gorî çavdêran, hedefgirtina bircên ragihandinê stratejiyek e ji bo qutkirina pêwendiyan û afirandina aloziyê di nav xelkê sivîl de.

Roja 3yê Adarê bircên ragihandinê yên li ser Çiyayê Korekê yê li parêzgeha Hewlêrê jî bi dronan hatibûn hedefgirtin. Her çend di wê êrîşê de zirar çênebûbû, lê dubarebûna êrîşê li Çiyayê Zimnako nîşan dide ku binesaziya teknolojîk a herêmê di bin metirsiyeke berdewam de ye.

Heta niha tu aliyekî bi fermî berpirsiyariya êrîşa li ser Çiyayê Zimnako negirtiye ser xwe, lê hêzên ewlehiyê yên herêmê lêkolînên xwe li ser bûyerê û nasnameya dronan berdewam dikin.