Hejmara qurbaniyên lehiyê 20 hezar kesan derbas kir: 43 hezar kes jî koçber bûn

PeyamaKurd – Hate ragihandin ku di encama lehiyên ku hefteya borî li Libyayê rabûne de, hejmara miriyan gihîştiye 11 hezar û 300 kesan, 10 hezar û 100 kes winda ne û 43 hezar kes jî koçber bûne.

Rayedarên Libyayê ragihandine ku herî zêde xisara lehiyê li ser bajarê Derna yê bakurê rojhilatê Libyayê çêbûye û pêdiviya lezgîn a alîkariyên wekî; xida, vehewandin, av û cilan heye.

Rêxistina navneteweyî ya penaberiyê jî eşkere kir ku ji ber lehiya li bakur-rojhilatê Libyayê herî kêm 43 hezar welatî koçber bûne.

Rêxistinê demek berê ragihandibû, ji ber kêmbûna ava paqij wê gelek welatî ji Dernayê ber bi rojhilat û rojavayê bajêr ve koçber bibin.