Dîsa bombe bariyan: Xelk nikare biçe ser erdên xwe

PeyamaKurd – Hat ragihandin ku doh 10ê Nîsanê car din balafirên şer ên Tirkiyê bi hinceta hebûna binkeyên PKKê gundewarên devera Amedîyê bombardiman kirin.

Li gor medya tirkî û ragihandina artêşa Tirkiyê binkeyên PKKê bûne armanc û hatine ruxandin.

Lê belê rayedarên herêmê diyar dikin ku bax û bostanên gundiyan ketine ber êrîşa bombardimanê û hîn jî ziyanên çêbûne nehatine tesbîtkirin.

‘GUND BI DIJWARÎ HATIN BOMBE KIRIN’

Berpirsê ragihandina rêveberiya nehiya Dêrelokê ya ser bi bajaroka Amediyê Mehmûd Nihêlî êrîşa doh piştrast kir û ev agahî dan:

“Duh 10.04.2019ê ji ber bahaneya hebûna binkeyên PKKê, balefirên şer ên artêşa Tirkiyê bi dijwarî gundên Sarkê û Ridênê yên devera Bergare ya sînorê qeza Amêdiyê bombebaran kirin û heta naha wek tê xwestin ziyanên wê bombebaranê nehatine zanîn.’’

‘XELK DITIRSA BIÇE NAV BAX Û BOSTANÊN XWE’

Li gor nûçeya BasNewsê Nihêlî destnîşan kir ku li sînorê her du gundên hatine bombebarankirin bax û bostanên xelkê gund hene û werzê biharê ye û xelk li wan gundan neçar in qesta gundê xwe bikin û bax û bostanên xwe biçînin.

Nihêlî diyar kir ku ji ber tirsa bombebaranê û parastina giyana xwe hatin û çûn metirsîdar e û xelk ditirse û wekî pêwîst nikare serdana gundên xwe bike.