Mesrûr Barzanî û Parêzgarê Necefê hevkariya dualî û pêngavên reformê gotûbêj kirin

PeyamaKurd - Serokê Hikûmeta Herêma Kurdistanê Mesrûr Barzanî, îro Parêzgarê Necefê Yûsif Gennavî û şandeya pêre ku ji rayedarên parêzgehê pêk dihat, pêşwazî kir. Di vê hevdîtina fermî de, Serokwezîr Mesrûr Barzanî amadebûna herdemî ya Hikûmeta Herêma Kurdistanê nîşan da ku di her warî de peywendî, hevkarî û koordînasyona piralî li gel parêzgehên Îraqê û bi taybetî li gel parêzgeha Necefê xurt bike da ku peywendiyên navxweyî pêş bikevin.

Sûdegirtina Necefê ji ezmûn û reformên Kurdistanê

Ji aliyê xwe ve, Parêzgarê Necefê Yûsif Gennavî armanca serdana xwe û şandeya pêre eşkere kir û destnîşan kir ku ew dixwazin têkiliyên dualî berfirehtir bikin. Gennavî tekez kir ku parêzgeha Necefê dixwaze feydeyê ji ezmûnên serkeftî û pêngavên reformê yên Hikûmeta Herêma Kurdistanê wergire, bi taybetî di warê geşepêdan û birêvebirina xizmetguzariyên giştî de da ku karibin projeyên nû yên pîşeyî li herêma xwe ava bikin.