Rojane 250,000 bermîlên petrolê ji Kerkukê bi rêya boriyên Herêma Kurdistanê wê werin hinardekirin

PeyamaKurd - Wezareta Çavkaniyên Xwezayî ya Hikûmeta Herêma Kurdistanê ragihand ku, piştî biryara Serokwezîr Mesrûr Barzanî û di bersiva rewşên awarte yên ku welat pê re rû bi rû ye, hinardekirina rojane ya 250,000 bermîlên petrolê bi rêya boriyên Herêma Kurdistanê bo Bendera Ceyhanê ya Tirkiyeyê dest pê kiriye.

Daxuyaniya fermî ya ku ji aliyê Wezareta Çavkaniyên Xwezayî ve roja Çarşemê, 18ê Adara 2026an de hatiye weşandin, van tiştan dihewîne:

"Li gorî biryara Serokwezîr Mesrûr Barzanî û bi berçavgirtina rewşên awarte yên ku welat pê re rû bi rû ye, Wezareta Çavkaniyên Xwezayî, bi hevrêziya Wezareta Petrolê ya Federal, îro sibê saet 06:30an de stasyona petrolê ya Saralo çalak kir."

Li gorî daxuyaniyê, ev gav armanc dike ku rojane 250,000 bermîlên petrolê bo stasyona Fişhabur û ji wir jî, bi rêya boriya Herêma Kurdistanê, bo Bendera Ceyhanê li perava Deryaya Spî were veguhestin.

Biryara Serokwezîr Mesrûr Barzanî wek gaveke stratejîk tê dîtin ku ji bo ji nû ve sazkirina sektora enerjiyê û piştgiriya aboriyê di vê serdema krîtîk de ji bo Iraq û herêmê hatiye avêtin.