Tirkiye û Sûriyeyê li dijî HSDyê li hev kirin? Zengilên ser li Minbic û Dêra Zorê lê didin

PeyamaKurd – Liv û tevgera leşkerî ya hevdem a artêşên Tirkiye û Sûriyeyê li Rojavayê Kurdistanê, li deverên kontrola Hêzên Sûriyeya Demokratîk (HSD) de, metirsiya operasyoneke hevbeş a leşkerî zêde kiriye. Tê îdiakirin ku eger HSD heta dawiya vê mehê şertên "tevlibûna artêşa Sûriyeyê" qebûl neke, êrîşeke berfireh dê dest pê bike.

Dorgirtina ji du aliyan ve
Di 48 demjimêrên dawî de, qada leşkerî ya Sûriyeyê şahidî ji tevgerên nenormal re dike:

• Li Bakurê Kurdistanê: Karwanên leşkerî yên artêşa Tirkiyeyê ji deriyên Efrîn, Serêkaniyê û Bakurê Helebê derbas bûn û ber bi sînorên Minbicê ve ketin tevgerê. Wêneyên ku di medyaya Tirk de belav bûne, nîşan didin ku çekên giran sewqî xeta M4 û derdora Minbicê tên kirin.

• Li Rojavayê Kurdistanê: Artêşa Sûriyeyê hêzên xwe yên Firqeya 86an, tevî topên giran û dronan, şandin Dêra Zorê, Bendava Tişrîn û derdora Reqayê.

Peyama ji Şamê: Serdana Generalên Tirk
Ev amadekariyên leşkerî, piştî serdana sosret a Serfermandarê Giştî yê Tirkiyeyê General Selçûk Bayraktaroglu bo Şamê pêk hatin. Bayraktaroglu li Şamê bi Serokkomarê Sûriyeyê Ehmed Şera û rayedarên bilind ên leşkerî re civiya û serdana "Navenda Operasyonên Hevbeş" kir. Tê gotin ku planên leşkerî di vê serdanê de hatine zelalkirin.

Plana 80 Hezar Leşkerî
Li gorî îdiayên rojnameyên nêzîkî hikûmeta Tirkiyeyê, Şamê amadekariya operasyoneke bi beşdariya 7 firqe û 80,000 leşkerî kiriye. Armanc ew e ku zextê li HSDyê bikin da ku xwe hilweşîne û bibe parçeyek ji artêşa Sûriyeyê. Herwiha tê xwestin ku eşîrên Ereb ên Dêra Zorê jî li dijî HSDyê werin sorkirin.

Bersiva HSDyê: "Şerê Psîkolojîk e"
Li hember van hemû liv û tevgeran, Fermandarê Lîwaya Bakur a HSDyê Ebû Omer el-Idlibî daxuyanî da û nûçe derewand. El-Idlibî got: "Tiştên têne gotin şerê medyayê û şerê psîkolojîk in. Li ser erdê tiştekî ku metirsiyeke mezin nîşan bide tune ye, rewş di bin kontrolê de ye."

Digel ku Wezareta Parastinê ya Tirkiyeyê vê tevgerê wekî "rutîn" bi nav dike, zexta demê ya "dawiya Kanûnê" îhtîmala pevçûnan xurtir dike.