Wezaret û payeyên Goranê di kabîneya nû de dîyar bûn

PeyamaKurd - Parlamenterekî Tevgera Goranê, paye û wezaretên Goranê ku di kabîneya nû ya hikûmeta herêma Kurdistanê de bên dayîn aşkera kir.

Li gorî nûçea BasNewsê, Endamê fraksiyona Tevgera Goran li parlamentoya Kurdistanê Daban Mihemed ragehand, Tevgera Goran û Partiya Demokrata Kurdistanê (PDK) li ser payeyên Goranê di hikûmeta nû de li hev kirine.

Herwaha Mihemed aşkera kir, ku namzedên Goran di kabîneya nû ya hikûmetê de bi rêya lijneyekî 11 kesî ve dê demekî kurt de bê zelalkirin û paye û wezaretên ku Goran wergire jî weha ne:

• Cîgirê Serokê Herêma Kurdistanê
• Alîkarê Serokê hikûmeta herêma Kurdistanê bo karûbarê çaksaziyê
• Wezareta Darayî û Aborî
• Wezareta Avadaniyê û niştecîhî
• Wezareta Bazirganî û Pîşesazî
• Wezareta Kar û Karûbarên Civakî

Li gor zanyariyan bi sedan kesan bi armanca bidestxistina payeyên bilind ên Tevgera Goran, CVyên xwe pêşkeşî Tevgera Goran kirine.